DILI, STLTIMORLESTE.com – Servisu Migrasaun asegura estranjeiru nain tolu (3) tanba viola regra migrasaun iha Dili.
Servisu Migrasaun (SM), Ministériu Interiór (MI), asegura sidadaun estranjeiru nain 3 ho inisiál NK, NLM no DF, iha operasaun rutina iha Kapital Dili.
Tuir informasaun Ministériu Interiór asesu hosi STL katak, estranjeiru sira ne’e uza vistu turista, maibé hala’o atividade komersiál iha hotel no salon.
Ekipa Migrasaun detein sira hafoin simu informasaun hosi Servisu Informasaun Sekreta. Operasaun ne’e hala’o durante oras haat iha Dili.
Ekipa halo inspesaun ba hotel, karaoke no salon massage iha área balun iha Kapital Dili, hodi verifika atividade sidadaun estranjeiru.
Diretor Servisu Investigasaun Kriminál (DSIK), Superintendente Xefe Polísia, João Belo dos Reis hateten katak, investigasaun deskobre sira tama ho vistu turista.
Maibé, sidadaun nain 3 ne’e deskobre hala’o servisu hodi buka rendimentu iha Timor-Leste, maski tama ho vistu turista.
Tuir Servisu Migrasaun, asaun ne’e konsidera violasaun ba Lei Migrasaun no Azilu. Autoridade sei aplika sansaun tuir dispozisaun legal.
Sansaun bele inklui pagamentu multa. Sidadaun ne’ebé la kumpre ka rekuza selu multa bele enfrenta prosesu tuir lei.
Além de nee, fontes konfirmadu hateten, Migrasaun sei haruka naran sidadaun sira ba Ministériu Públiku, se la kumpre obrigasaun selu multa.
“Ita sei kontinua halo monitorizasaun no operasaun rutina hodi garante kumprimentu ba regra migrasaun iha Timor-Leste tomak,” nia afirma.
(jen)
