DILI, STLTIMORLESTE.com — Banco Central Timor-Leste (BCTL) promove sistema pagamentu dijital liuhosi telefone no QR atu fasilita transasaun, hamenus uza osan fiziku, no apoia digitalizasaun ekonomia.
Governador Banku Sentral Timor-Leste (BCTL), Helder Lopes hatete, BCTL sei kontinua promove sistema pagamentu nasional dijital liuhosi telefone no aplikasaun QR, atu fasilita asesu kliente ba servisu finanseiru.
“Ami nia mandatu atu promove sistema pagamentu nasional liuhosi telefone no aplikasaun QR, hodi fasilita kliente sira tau osan iha banku no asesu konta bankária liuhosi aplikasaun telefone,” dehan Helder ba jornalista sira iha Auditóriu IOB Fomentu II, Kinta (10/09/2026).
Nia hatete, sistema pagamentu dijital sei permite konsumidór sira halo pagamentu bainhira sosa sasán sem presiza lori osan ka kartaun fiziku, maibé uza telefone ne’ebé liga ho konta bankária.
Tuir Helder, pagamentu dijital sei fó benefísiu liuhosi lalais no efisiénsia iha transasaun, no mos suporta digitalizasaun ekonomia no dezenvolvimentu indústria finanseira iha Timor-Leste.
Nia hatete BCTL sei prepara lansamentu sistema pagamentu dijital ne’ebé sei permite populasaun uza telefone nu’udar meiu pagamentu iha transasaun komersiál.
Helder mos husu estudante sira atu uza sistema pagamentu dijital ho responsabilidade no fahe koñesimentu ba inan-aman sira, atu aumenta komprensaun kona-ba servisu finanseiru dijital.
“Ami sei asina akordu ho Indonézia, para bainhira halo viajen ba ne’ebá, karik haluha osan ka haluha kartaun, laiha problema. Maibé labele haluha telefone atu fasilita pagamentu bainhira sosa sasán,” dehan nia.
Nia hatutan katak kooperasaun pagamentu dijital sei espande ba nasaun ASEAN sira seluk, nu’udar parte hosi esforsu BCTL atu integra no promove sistema pagamentu dijital iha rejiaun.
Tuir Helder, pagamentu dijital sei ajuda hamenus dependénsia ba osan no kartaun fiziku, enkuantu transasaun bele sai lalais no efisiente.
(dom)
