DILI, STLTIMORLESTE.com – Too agora, eskola sira iha Munisípiu Manatuto sei hasoru difikuldade kona-ba material ne’ebé uza atu hala’o atividade prátika iha eskola.
Lia hirak nee Diretor Servisu Edukasaun Munisípiu Manatuto, Luis Antonio Soares hato’o ba STL liu husi telefone, Sesta nee (11/09/2026).
Nia dehan, dezafiu ne’ebé eskola sira iha Munisípiu Manatuto enfrenta mak falta material, no rekursu umanu iha Servisu Edukasaun Munisípiu Manatuto mos seidauk sufisiente atu kobre eskola sira hotu.
“Konaba difikuldade, ita iha difikuldade barak. Ida konaba material ba apoiu sira ne’e, ita sei iha difikuldade. Depois, deslokamentu pesoál sira ba iha eskola sira ne’e mos ita iha problema, tanba pesoál tékniku husi ami nian, ita iha rekursu ne’ebé too agora sei menus. Depois ita ho area ne’ebé luan, maibé ita labele kobre hotu ita nian eskola sira, ho nune’e bele atinji tuir polítika husi Ministériu Edukasaun nian,” nia informa.
Nia dehan, oras ne’e tékniku sira husi Edukasaun Munisípiu Manatuto sei menus, tanba eskola sira iha area remotas ho distánsia ne’ebé dook malu. Ho númeru tékniku ne’ebé limitadu, Edukasaun Munisípiu Manatuto labele kobre eskola sira hotu.
“Ita presiza aumenta material prátika nian, ne’ebé dadaun ne’e ita sei menus, tanba ita nian eskola balun ne’ebé aumenta material hirak ne’e,” nia dehan.
(jac)
