DILI, STLTIMORLESTE.com — Ministru Saúde Bhutan, Tandin Wangchuk apresia kapasidade Timor-Leste atu dezempenha papel di’ak iha nivel internasionál no hametin relasaun bilaterál entre nasaun rua.
Ministru Saúde Bhutan hato’o deklarasaun ne’e ba jornalista sira iha Palásiu Prezidensial, Bairo Pite, Dili, Sesta (11/09/2026), hafoin hasoru Prezidente Repúblika, José Ramos-Horta.
“Ohin ha’u mai hasoru Prezidente Repúblika, José Ramos-Horta. Primeiru, ha’u konsidera nu’udar onra boot tebes atu hasoru ema ida ne’ebé partisipa iha luta ba liberdade, kontribui iha nivel internasionál no agora kontinua servisu nu’udar Prezidente husi nasaun ida,” dehan Tandin Wangchuk.
Nia mós hato’o apresiasaun ba Governu Timor-Leste, liuliu Ministériu Saúde, tanba ospitalidade no apoiu ba enkontru komité rejionál saúde ne’ebé hala’o iha Timor-Leste.
Nia konsidera enkontru ne’e susesu no hatudu ba rejiaun katak Timor-Leste iha kapasidade atu desempenha papel importante iha nivel internasionál.
“Ospitalidade no maneira Timor-Leste simu ami mós di’ak tebes. Ida-ne’e la’ós ha’u-nia primeiru vizita ba Timor-Leste. Ida-ne’e ha’u-nia segunda vizita. Ha’u mai iha tinan 2015 nu’udar Ministru Saúde atu partisipa enkontru rejionál,” haktuir nia.
Tandin konta katak iha ninia vizita iha 2015, Primeiru-Ministru Timor-Leste no Ministru Saúde iha tempu ne’ebá simu prémio saúde públika husi rejiaun. Memória kona-ba vizita ne’e sei hela iha nia neon.
“Ha’u sei iha memória di’ak kona-ba momentu ne’e. Hafoin tinan 11, ha’u fila mai fali Timor-Leste no surpreende haree dezenvolvimentu ne’ebé akontese,” afirma nia.
Nia mós apresia lideransa Timor-Leste, liuliu líder sira ne’ebé liu husi sofrimentu durante luta ba independénsia, maibé kontinua servisu ho hanoin fresku no kompromisu ba nasaun.
Tandin dehan nia kontente tanba iha oportunidade atu hasoru fali líder Timor-Leste no haree katak sira kontinua servisu ho di’ak.
Konvida Prezidente ba Bhutan
Tandin hateten katak ninia enkontru ho Prezidente José Ramos-Horta mós iha objetivu atu konvida Xefe Estadu Timor-Leste ba vizita Estadu ba Bhutan.
“Ohin mai enkontru ho Prezidente Repúblika Timor-Leste, José Ramos-Horta, ho objetivu atu konvida Prezidente Timor-Leste ba vizita Estadu ba Bhutan, no mós atu agradese ba Prezidente tanba simu no apoia ami durante vizita ne’e,” afirma nia.
Nia dehan, iha enkontru ne’e sira mós ko’alia kona-ba vizita Estadu, no Prezidente José Ramos-Horta sei fó hatene bainhira tempu ne’ebé apropriadu atu realiza vizita.
Hametin Relasaun Diplomátika
Tandin subliña katak relasaun bilaterál entre Bhutan no Timor-Leste mós sai asuntu importante iha enkontru.
Maski nasaun rua dook malu tanba tasi no iha nasaun seluk entre sira, Tandin dehan povu no kultura Bhutan no Timor-Leste iha aspetu barak ne’ebé hanesan.
“Ha’u haree ona ida-ne’e iha vizita 2015 no agora mós. Maneira ami hanoin no kultura ami iha aspetu barak ne’ebé hanesan. Ida-ne’e halo ami fiar katak relasaun di’ak no apoiu malu entre nasaun rua importante tebes,” haktuir nia.
Nia mós informa katak prosesu atu estabelese relasaun diplomátika formál entre Bhutan no Timor-Leste remata ona no sei tuir prosesu asina akordu, inklui nomeasaun embaixadór no estabelesimentu embaixada.
“Ha’u no ekipa kontente tebes tanba hetan oportunidade atu hasoru Prezidente, ema ida ne’ebé partisipa diretamente iha luta ba liberdade, kontribui iha arena internasionál no hetan onra boot liuhusi Prémio Nobel da Paz,” haktuir Tandin.
(jos)
