DILI, STLTIMORLESTE.com – Tribunal Judisiál Primeira Instánsia Dili (TJPID) liuhusi despaxu ba prosesu primeiru interogatóriu, deside aplika medida koasaun no Proibisaun Aujensia ba arguidu na’in lima ho inisiál YA, HZ, YJ, YY no HJ.
Arguidu sira hetan akuzasaun husi Ministériu Públiku, liuhusi Prokuradór Domingos Gouveia Leite, tanba suspeita komete krime tranzasaun ilícita no asosiasaun kriminóza, ne’ebé previstu iha Artigu 188 husi Kódigu Penál.
Juíza turnu, Fransisca Cabral, rona tiha deklarasaun arguidu sira no kontinua prosesu ba faze alegasaun.
Iha alegasaun, Ministériu Públiku husu ba Tribunal atu aplika medida tolu ba arguidu sira, inklui prizaun preventiva, proibisaun ba ausénsia no medida kausão ho montante US$ 5,000 ba kada arguidu.
Enkuantu, parte defeza husu Tribunal atu aplika medida kausão ho montante US$ 3,000 ba kada arguidu, no medida proibisaun ba ausénsia.
Depois de rona alegasaun husi parte hotu, Juíza deside aplika medida proibisaun ba ausénsia no medida kausão ho montante US$25,000 ba kada arguidu.
Tribunal fó prazu loron 10 ba arguidu sira atu depozita osan kausão iha Tribunal. Se arguidu sira la depozita osan iha prazu ne’ebé determina, Tribunal sei konsidera alterasaun ba medida koasaun seluk.
Rekorda katak, arguidu sira detein husi autoridade seguransa tanba uza ro ilegal tama ba territóriu Timor-Leste. Tanba suspeita ne’e, Unidade Polísia Marítima detein arguidu sira.
Prosesu ne’e prezide husi Juíza Fransisca Cabral, Ministériu Públiku reprezenta husi Prokuradór Domingos Gouveia Leite, enkuantu arguidu sira hetan asisténsia legál husi advogadu privadu Ezaquiel Amaral.
(ter)
