BAUCAU, STLTIMORLESTE.com – Projetu konstrusaun Merkadu Multi-Suku iha Suku Ossohuna, Postu Administrativu Baguia, Munisípiu Baucau, ne’ebé finansia liuhusi Autoridade Munisipál Baucau (AMB) ho valór orsamentu rihun US$ 122,495.60.
Xefe Suku Ossohuna, Paulo dos Reis Piedade, esplika katak projetu ne’e husi Autoridade Munisípal Baucau enkaixa iha Programa Dezenvolvimentu Integradu Munisipál (PDIM) atual, parte kompaña halo ona mobilizasaun no transportasaun materiál konstrusaun no hahú servisu hada fundasaun iha terenu.
“Suku hotu hakarak projetu PDIM, maibé ami agradese tanba hili ona Ossohuna. Durante implementasaun, ami sei kontrola hodi garante katak projetu ne’e bele remata tuir kontratu,” Xefe Suku Ossohuna informa ba jornalista sira iha Vila Nova, Sesta (11/09/2026).
Paulo Piedade hateten katak Merkadu Multi-Suku ne’e sei sai fasilidade importante ba komunidade, liuliu negosiante sira husi Suku Ossohuna, Hae-Coni no Afaloicai, inklui komunidade husi suku sira besik iha Postu Administrativu Uatucarbau no Uatulari, Munisípiu Viqueque, atu hala’o atividade ekonomia.
“Ami agradese tanba projetu ne’e sei fasilita komunidade atu fa’an sira-nia produtu iha merkadu ne’ebé besik liu,” nia akresenta.
Tuir nia esplikasaun, projetu ne’e mos responde ba ezijénsia husi autoridade postu no suku iha Baguia, ho medida naruk 24 metru no luan 15 metru.
Paulo Piedade hateten katak lokalizasaun merkadu konsidera mos fatór distánsia no asesu estrada, ho objetivu atu hakbesik atividade komérsiu ba komunidade sira iha área rurál.
Projetu Merkadu Multi-Suku ne’e sei harii iha área ho medida rai 50 m², lokalizada iha Aldeia Uaecadae, Suku Ossohuna, responsabilidade husi Kompañia Lokál Nautetu, Lda no tuir kontratu, períodu implementasaun projetu ne’e tinan ida, hahú husi Jullu 2026 to’o Jullu 2027.
(tom)
