DILI, STLTIMORLESTE.com – ONU kontinua apoia Timor-Leste iha bee-moos, saneamentu no enerjia solar, atu ajuda komunidade sira no alkansa objetivu dezenvolvimentu sustentável.
Koordenadora ONU iha Timor-Leste, Funmi Balogun, hato’o informasaun ne’e ba jornalista sira bainhira remata halo enkontru ho Prezidente Republika José Ramos-Horta iha Palásiu Prezidensiál Nicolau Lobato, Bairru Pite, Kuarta (16/09/2026).
Funmi Balogun hatete, katak UNICEF serbisu ona iha área bee no saneamentu, tanba Timor-Leste hasoru dezafiu iha asesu ba bee-moos.
Nia esplika katak, apoiu ONU inklui prezervasaun bee nian no fornese enerjia solar ba komunidade sira.
“UNICEF serbisu ona kona-ba bee no saneamentu tanba, hanesan ita hatene, Timor-Leste ne’e bee-moos uitoan,” Funmi Balogun hatete.
Nia mós hatete katak, UNDP ho apoiu Governu Japaun, fornese painél solar ba uma-kain sira iha komunidade, atu ajuda hamenus presaun ba eletrisidade no uza mina-rai.
Funmi Balogun hatete, ONU kontinua apoia Governu Timor-Leste no povu iha prosesu dezenvolvimentu, maibé responsabilidade prinsipál sei iha Governu Timor-Leste.
“ONU nu’udar parseiru, ita suporta hela Governu Timor-Leste no povu iha sira-nia dezenvolvimentu, alkansa iha sira-nia objetivu dezenvolvimentu, maibé la’ós substituisaun ba governu,” nia hatete.
Nia hatete, ONU fó apoiu tékniku no finansiamentu limitadu iha área sira ne’ebé bele ajuda, atu asegura povu Timor-Leste alkansa Objetivu Dezenvolvimentu Sustentável (ODS).
ONU nia serbisu iha Timor-Leste inklui apoiu ba bee-moos, saneamentu, enerjia renovável no reziliénsia komunidade nian. Objetivu Dezenvolvimentu Sustentável (ODS) nu’udar agenda globál atu promove dezenvolvimentu inkluzivu, sustentável no hadi’a moris povu sira.
(eme)
