DAKAR, SENEGAL, STLTIMORLESTE.com – Jogos Olímpicos Juventude Verão 2026 hahú ofisialmente iha Senegal, 31 Outubru, ho serimónia abertura iha Stade Abdoulaye Wade, Diamniadio.
Senegal sai nasaun dahuluk iha kontínente Afrika ne’ebé organiza eventu olímpiku, marka momentu istóriku ba movimentu olímpiku mundiál.
Kompetisaun ne’e hala’o durante loron 14, husi 31 Outubru to’o 13 Novembru 2026, ho partisipasaun komité olímpiku 204, inklui Ekipa Juventude Refujiadu.
Timor-Leste partisipa hamutuk ho nasaun 204 seluk, inklui membru ASEAN, atu reprezenta bandeira nasionál no hatudu kapasidade atleta joven Timoroan.
Dakar 2026 inklui modalidade desportiva 25 no eventu medalha 153, ne’ebé hala’o iha lokalidade Dakar, Diamniadio no Saly.
Ba Timor-Leste, partisipasaun ne’e oportunidade importante atu atleta joven hetan esperiénsia internasionál, dezenvolve kapasidade no promove naran nasaun.
Nasaun membru ASEAN hamutuk 11 partisipa iha kompetisaun ne’e, hatudu envolvimentu rejiaun Ázia Sudeste iha eventu desportivu juventude mundiál.
Tailándia reprezenta ho atleta 28, Singapura 13, Indonézia no Malázia 12 kada nasaun, no Vietname ho atleta 10.
Filipinas partisipa ho atleta 9, Kambódia 4, Brunei no Timor-Leste 3 kada nasaun, enkuantu Laos no Mianmar ida kada nasaun.
Partisipasaun ne’e mós fó oportunidade ba atleta Timoroan atu hasa’e kapasidade kompetitivu no prepara an ba kompetisaun internasionál futuru.
Modalidade 25 inklui atletismu, natasaun, badminton, boxe, judo, taekwondo, futsal, volleyball praia, basketball 3×3, ciclismu, ginástika no modalidade desportiva seluk.
Dakar 2026 la’ós de’it kompetisaun buka medalha, maibé mós plataforma atu hametin amizade, solidariedade, respeitu no espíritu olímpiku entre juventude mundiál.
(leo)
