DILI, STLTIMORLESTE.com – Livrus iha Ensinu Baziku Filial (EBF) Vila-Verde, Munisípiu Dili, sufisiente ona ba estudantes sira, hodi sira bele asesu no uza livrus sira iha biblioteka eskola nian.
Kordenadora EBF Vila-Verde, Josefina Maia, afirma ba STL iha nia fatin servisu, Kuarta-feira (16/09/2026).
“Ami nia livrus sufisiente hodi estudantes sira bele uza. Livrus sira uluk mai husi UNICEF, ne’ebé servisu hamutuk ho Ministériu Edukasaun (ME), no hatama livrus sira mai iha eskola. Tanba ne’e, ami iha livrus sufisiente no mos iha biblioteka ida,” dehan nia.
Josefina hatete, bainhira nia asume kargu kordenadora, nia orienta professores sira atu hamos no hadia biblioteka, hodi bele uza ho diak.
Nia hatete katak livrus sira rai iha biblioteka, hahu husi livrus ba estudante klase primeiru to’o klase neen, hodi estudantes sira bele asesu no lee livrus sira iha fatin ne’ebé prepara ona.
“Agora dadaun ami nia livrus sufisiente ba estudantes sira, hodi sira bele asesu iha biblioteka. Estudantes sira loroloron tama sai iha biblioteka hodi asesu ba livrus sira,” tenik nia.
Enkuantu ne’e, estudante Olandino Gomes hatete katak estudantes sira asesu ba livrus iha biblioteka loroloron. Depois de aula, sira tama iha biblioteka hodi lee no halimar ho livrus sira.
“Loroloron ami tama sai biblioteka, lee livrus sira. Bainhira ami lee hotu, ami tenke rai fali ho didiak, hodi bele asegura livrus sira. Bainhira remata uza, presiza hadia no rai fali iha fatin,” nia esplika.
Olandino hatete tan katak livrus barak rai ona iha biblioteka, no estudantes sira bele foti hodi lee depois de aula. Kona-ba livrus sufisiente ka lae, tuir nia, eskola mak bele hatene no avalia nesesidade.
Estudante Rui da Costa mos hatete katak estudantes feto no mane asesu ba livrus iha biblioteka loroloron. Maibé, bainhira foti livrus hodi lee, sira presiza rai fali ho didiak depois de uza.
“Ami sempre tama sai iha biblioteka atu lee livrus. Bainhira ami lee hotu, ami rai fali iha fatin, atu nune’e ema seluk bele asesu fali,” nia deklara.
(jac)
