DILI, STLTIMORLESTE.com – Stok sementi menus iha loja konstrusaun balun iha Kapital Dili, tanba fornesimentu marka balun seidauk to’o ba merkadu.
Xefi Kontrolu Sasán Loja Lay, Antonio Surato, hatete loja ne’e agora iha stok sementi 15.000 sakas ne’ebé konsidera naton atu atende nesesidade konsumidór sira.
“Sementi ne’ebé ami nia roo lori mai Timor-Leste to’o iha Domingu. Semana oin sei sobu hodi lori mai gudang. Agora ami sei iha stok 15.000 sakas, no sementi ne’ebé iha dalan sei mai tan 187.500 sakas,” dehan Antonio ba STL iha Loja Lay, Kuarta (16/09/2026).
Nia hatete, konsumidór sira barak mai buka sementi iha Loja Lay tanba loja ne’e sei iha sementi marka Tonasa, enkuantu loja konstrusaun balun seluk enfrenta menus stok.
Agora, sementi marka Tonasa fa’an ho folin US$ 4,20 kada saku no US$ 210 kada jumbo. Sementi marka Tiga Roda mos fa’an ho folin hanesan.
Enkuantu sementi marka Kaito fa’an ho folin US$ 4,30 kada saku no US$ 215 kada jumbo. Maibé, marka Kaito no Tiga Roda iha loja ne’e disponivel de’it iha forma tula, la iha ona iha sakas.
Responsável Nota Loja Konstrusaun 8888 Tasitolu, Linda Soares, hatete stok sementi iha loja ne’e menus tebes, no agora hela de’it sementi marka Cons, maibé stok marka ne’e mos hahu menus.
Nia hatete sementi marka Cons simu husi gudang ho folin US$ 4,20 kada saku no fa’an fali ba konsumidór ho folin US$ 4,50. Antes, bainhira stok normal, sementi ne’e fa’an ho folin US$ 4,25 kada saku.
“Stok normal ami fa’an saku ida US$ 4,25. Agora ho stok menus ami fa’an US$ 4,50, maibé nee ba sementi marka Cons. Iha nee sementi Tonasa laiha ona,” dehan Linda.
Nia hatutan, loja sosa sementi husi gudang Cons no Tonasa iha Bebonuk. Sementi marka Cons kada jumbo sosa ho folin US$ 210 no fa’an fali ba konsumidór ho folin US$ 220.
Linda hatete konsumidór sira barak buka liu sementi marka Tonasa, maibé menus stok halo loja sira la konsege atende demanda konsumidór hotu.
Konsumidór Natalino Pereira mos relata katak nia hasoru difikuldade atu hetan sementi Tonasa iha loja konstrusaun sira iha semana kotuk.
“Hau halo hela uma. Iha Sábado foin lalais hau ba buka sementi Tonasa iha loja Xina sira nian, maibé laiha hotu. Iha Segunda-feira hau buka fali no konsege hetan, maibé folin sae husi US$ 4,50 ba US$ 5 kada saku,” dehan Natalino.
Nia husu Governu atu monitoriza no kontrola folin sementi bainhira stok menus iha merkadu, tanba, tuir nia, situasaun ne’e bele lori loja balun hasa’e folin.
Problema kona-ba menus stok sementi ne’e, tuir lojista sira, lao ona durante semana rua.
(dom)
