DILI, STLTIMORLESTE.com — Governu hasai rezolusaun ida hodi ezonera Alexandre Corte Real husi pozisaun hanesan Vogal iha Konsellu Superior Majistradu Judisiál (KSMJ), depois nia partisipa iha prosesu konkorsu ba Tribunal Supremu.
Alexandre Corte Real hateten katak, razaun Governu uza atu ezonera nia mak relasiona ho nia partisipasaun iha teste ba Tribunal Supremu. Nia afirma katak lei la bandu membru KSMJ ida atu konkore ba pozisaun iha Tribunal Supremu.
“Governu dehan hau ba teste iha Supremu, nee mak sira ezonera hau. Tribunal Supremu la viola lei ida. Lei la bandu katak Konsellu labele ba teste. Lei la bandu se Konsellu ka ema públiku hakarak konkore. Hau ba konkore,” dehan Alexandre ba STL iha Kaikoli, Kuarta (16/09/2026).
Nia hatutan katak, maski la hatene ho klaru razaun prinsipál Governu nian atu ezonera nia, nia respeita no kooperasaun ho desizaun ne’ebé Governu foti.
“Hau simu desizaun Governu no hau kooperasaun. Agora, razaun sai nee ka Governu dehan hau sai tanba teste ba Supremu,” dehan nia.
Alexandre Corte Real hahú hala’o knaar hanesan Vogal iha KSMJ iha fulan Agostu 2026.
Iha sorin seluk, akademiku Universidade Nasionál Timor Lorosa’e (UNTL), Sebastião dos Santos, hateten katak se lei permite ezonerasaun, importante atu nomeia ema seluk hodi prenxe pozisaun ne’ebé mamuk.
“Se lei fo dalan bele ezonera, importante maka nomeia fali ema ida ba tur iha fatin nee, hodi servisu KSMJ nian bele funsiona nafatin,” dehan nia.
Nia hatutan katak, KSMJ importante atu hala’o nia knaar ho di’ak, liuliu iha kontrolu ba juíz sira atu garante sira hala’o servisu tuir lei.
Enkuantu Prezidente Tribunal Rekursu, Afonso Carmona, hateten katak nia la iha koñesimentu kona-ba ezonerasaun Alexandre Corte Real.
“Buat polítiku husu ba Ministru Justisa, la’ós hau,” dehan Prezidente Tribunal Rekursu.
Tuir informasaun ne’ebé hetan, Governu ezonera Alexandre Corte Real, maibé mos nomeia Nelinho Vital atu sai Vogal foun iha KSMJ.
(ter)
