DILI, STLTIMORLESTE.com – Kualidade edukasaun depende ba pontu lima importante, hadia kualidade dosente, métodu ensinu aprendizajen, kuríkulu, avaliasaun ba estudante no infraestrutura.
Lia hirak hatoo husi Fakuldade Edukasaun ISC, Zelio da Conceicao Freitas ba STL iha Kampus ISC Balide, Kuarta (16/09/2026).
“Primeiru ita tenke hadia kualidade dosente, segundu hadia métodu ensinu aprendizajen, terseiru hadia kuríkulu no hadia sistema avaliasaun ba estudante no hari infraestrutura edukasaun,” nia dehan.
Nia hatete, atu hadia kualidade ensinu, presiza preparasaun no formasaun ba dosente sira liuhusi workshop no semináriu internasionál.
Dosente sira mós tenke publika artigu sientífiku hodi hadia sira nia pensamentu.
Nia dehan, métodu aprendizajen tenke garante dosente sai sentru ba prosesu hotu.
Kona ba kuríkulu, nia hatete kada tinan lima universidade presiza halo avaliasaun hodi haree atinjimentu to’o iha ne’ebé.
Sistema avaliasaun laos deit formativa, maibe mós sumativa hodi haree estudante nia koñesimentu no garante sira prontu ba moris reál hafoin remata estudu.
Nia mós koalia kona ba garantia kualidade interna (AQI) ne’ebé ISC iha. Fakuldade no departamentu iha papél atu kontrola no halo avaliasaun ba prosesu aprendizajen.
“Depois avaliasaun sira nee sei enkontru, ita bele hato’o katak dosente ida ne’e nia performance to’o iha ne’e,” nia dehan.
Nia hatutan, fakuldade mós fortalese peskiza no servisu komunitária. Kada tinan estudante sira tun ba halo prátika no kada departamentu halo Community Service.
Fakuldade Edukasaun foka ba eskola Ensinu Báziku no Sekundáriu hodi fó formasaun kona ba Siénsia, tanba dosente la’ós iha sala laran de’it, maibé mós iha sosiedade.
(joa)
