DILI, STLTIMORLESTE.com – Primeiru-Ministru (PM) Kay Rala Xanana Gusmão hatete katak, relatóriu pobreza ne’ebé Ministériu Finansas (MF) aprezenta iha Konsellu Ministrus (KM) diferente ho relatóriu Banku Mundial, tanba relatóriu Banku Mundial refere ba dadus hosi tinan 2014.
PM Xanana hato’o deklarasaun ne’e bainhira remata enkontru semanal ho Prezidente Repúblika José Ramos-Horta, iha Palásiu Prezidensiál Nicolau Lobato, Bairo Pite, Dili, Kinta (17/09/2026).
Nia hatete katak Vise-Ministra Finansas, Regina de Jesus, aprezenta relatóriu kona-ba pobreza iha Timor-Leste, ne’ebé halo husi Ministériu Finansas rasik.
“Vise-Ministra Finansas aprezenta mós relatóriu ne’ebé husi Finansas rasik hasai kona-ba pobreza iha Timor. Tanba ne’e mak diferente oituan ho relatóriu Banku Mundial nian. Iha Konsellu Ministrus ami husu ba Finansas atu aprezenta didi’ak relatóriu ne’e, halo komparasaun ho saida mak Banku Mundial tau nee, para ami Governu prepara kuandu to’o iha Parlamentu diskusaun Orsamentu Estadu sira sei hakilar ami rona tuir Banku Mundial nia relatóriu. Banku Mundial nia relatóriu ne’e refere ba 2014, ho ida ne’e hau informa ona ba Prezidente,” dehan PM Xanana.
Alende nee iha reuniaun KM, Governu apoia publikasaun Relatóriu Sumáriu kona-ba Pobreza iha Timor-Leste, ne’ebé aprezenta husi Vise-Ministra Finansas, Regina de Jesus.
Relatóriu ne’e elabora bazeia ba rezultadu Peskiza kona-ba Kondisaun Moris iha Timor-Leste (TLSLS) 2024, no aprezenta dadus atualizadu kona-ba insidénsia no karakterístika pobreza iha nasaun ne’e.
Rezultadu relatóriu hatudu katak taxa pobreza nasionál tun hosi 41,8% iha 2014 ba 37% iha 2024, ho redusaun 4,8 pontu persentajen durante dékada ikus.
Dadus ne’e mós hatudu katak pobreza kontinua iha insidénsia aas liu iha área rurál, ne’ebé afeta 45,5% hosi populasaun, kompara ho 18,4% iha zona urbana. Iha diferensa mós entre munisípiu sira kona-ba taxa pobreza.
Hafoin publikasaun relatóriu sumáriu, INETL, IP no Ministériu Finansas, ho apoiu husi Banku Mundial, sei dezenvolve Avaliasaun Pobreza no Ekuidade bazeia ba dadus TLSLS 2024.
Avaliasaun ne’e iha objetivu atu aprofunda análize kona-ba fatór sira ne’ebé kontribui ba redusaun pobreza, no apoia formulasaun polítika públika bazeia ba evidénsia. Inisiativa ne’e mós orienta ba kreximentu ekonómiku ne’ebé inkluzivu no rezistente liután iha Timor-Leste.
(eme)
