DÍLI, STLTIMORLESTE.com – Relasiona ho teste vaga ba iha Supremu Tribunal Justisa (STJ) no Tribunal Rekursu (TR), Konsellu Superior Majistradu Judisiál (KSMJ) hasai deliberasaun ida kona-ba pontu toleránsia ba juiz sira ne’ebé sei tuir teste.
“Bazeia ba deliberasaun KSMJ ne’ebé foti iha loron 9 fulan-Setembru tinan 2026, KSMJ tetu no deside atu fó toleránsia de pontu. Bazeia ba avizu Komisaun Rekrutamentu ne’ebé fó sai, teste sei hala’o iha loron 18, 21, 25 no 28,” dehan Juiz Administradór Tribunal Dili, Yudi Pamukas, ba jornalista sira iha Kaikoli, Kinta-feira (17/09/2026).
Nia hatutan katak, deliberasaun KSMJ fó toleránsia de pontu ba juiz sira iha loron rua antes sira hasoru teste. Toleránsia pontu ne’e la’ós obrigatóriu katak juiz sira tenke foti férias, maibé ba juiz sira ne’ebé la iha nesesidade urjente iha tribunal, sira bele uza tempu ne’e atu prepara an no estuda antes teste.
“Juiz sira iha direitu atu konkore ba karreira ne’e. Tanba ne’e, sira tenke prepara an didi’ak. Iha loron ne’ebé teste sira livre husi servisu tribunal hanesan toleránsia de pontu, KSMJ fó tempu ba sira atu fokus ba konkursu ne’e,” nia hateten.
Nia akresenta katak, KSMJ mos alerta juiz administradór sira atu jere tribunal no juiz sira nia prosesu servisu ho di’ak. Prosesu sira ne’ebé urjente tenke atende, maibé prosesu normal bele adia ba loron seluk, tuir agenda ida-idak.
Nune’e, Juiz Administradór tenke garante katak tribunal labele taka ba públiku durante juiz sira iha tribunal atu hala’o pontu servisu ne’ebé presiza.
Nia reforsa tan katak, iha Tribunal Dili iha juiz na’in rua ne’ebé la konkore ba vaga ne’ebé loke.
“Ba Tribunal Dili iha juiz na’in rua ne’ebé la tuir. Ida seidauk prense kritériu, no ida seluk, tanba inisiativa rasik, lakohi tuir,” dehan nia.
Iha fatin ketak, Prezidente Tribunal Rekursu, Afonso Carmona, dehan juiz sira sei tuir teste eskrita ba vaga STJ no TR iha loron ne’ebé Komisaun Rekrutamentu determina ona.
“Komisaun determina ona loron atu hala’o teste. Tanba ne’e, juiz sira sei partisipa iha teste iha fatin neebe Komisaun prepara ona,” dehan nia.
Nia hatutan katak, teste ne’e sei hala’o ho rigor, tuir matéria no mekanizmu ne’ebé Komisaun Rekrutamentu no Júri sira prepara ona.
Antes ne’e, Prezidente Komisaun Rekrutamentu no Selesaun ba Juiz Supremu Tribunal Justisa, Avelino Coelho, hateten katak teste sei hahu iha loron 18 Setembru.
“Iha loron 18 too 21 Setembru, ezame eskrita ba Supremu Tribunal Justisa. Depois, iha loron 21 too 28, ezame eskrita ba Juiz Desembargadór sira ba Tribunal Rekursu,” dehan nia.
(ter)
