DÍLI, STLTIMORLESTE.com – Sekretariadu Estadu Asuntu Toponímia no Organizasaun Urbana (SEATOU) kondena asaun husi ajénsia no sidadaun estranjeiru neebé deskonfia estraga no sobu parte husi fasilidade públika, liuliu jardín foun iha área Aimutin, Díli, atu fasilita asesu ba loja ida iha fatin refere.
Sekretáriu Estadu Asuntu Toponímia no Organizasaun Urbana, Germano Santa Brites Dias, hatete katak autoridade sei aplika sansaun tuir lei no husu parte neebé halo estragus atu hadia fila-fali jardín ba nia kondisaun orijinál.
“Ita fó sansaun multa no dada fita haleu konstrusaun nee. Sira tenke hadia fila-fali jardín nee ba nia orijin, foin bele kontinua fali sira-nia konstrusaun,”hatete Germano Santa Brites Dias, liuhusi nota imprensa neebé STL asesu hosi pájina Facebook ofisiál SEATOU, Kinta (17/09/2026).
Nia husu sidadaun Timoroan no estranjeiru, inklui empreza sira, atu kumpre regra kona-ba orden públiku no proteje patrimóniu públiku.
“Nafatin apelu ba sidadaun hotu, inklui empreza no sidadaun estranjeiru sira, atu kumpre regras orden públiku no labele estraga patrimóniu Estadu nian neebé halo ho osan povu, hodi haforsa imajen kapitál sidade nian,” dehan nia.
SEATOU mós informa katak, kazu nee komunika kedas ba Polícia Nasionál Timor-Leste (PNTL) atu bolu parte sira neebé envolve ba presta deklarasaun.
Autoridade kompetente sei halo verifikasaun no, tuir SEATOU, sei aplika medida administrativu, inklui multa, no taka ka serka área konstrusaun neebé konsidera viola regra sira.
Xefe Suku Komoro husu investigasaun
Iha parte seluk, Xefe Suku Komoro, Eligio José da Silva Marçal lamenta akontesimentu nee no husu PNTL atu halo investigasaun kona-ba estragus jardín iha Aimutin.
Eligio José da Silva Marçal hatete katak, Xefe Suku Komoro la hetan informasaun kona-ba asaun nee no la fó autorizasaun atu sobu fasilidade públika.
“Xefe Suku la iha konesimentu kona-ba buat nee. Sira la mai iha nee atu husu autorizasaun bele ka labele. Tanba nee, hau husu atu halo investigasaun ba sira, atu hatene tanba saida mak sira sobu jardín nee”, dehan nia.
Nia hatete katak, antes nee, iha sidadaun balun neebé aprezenta karta ba Xefe Suku Komoro hodi husu autorizasaun atu loke asesu ba loja sira.
Maibé, tuir nia, pedidu atu loke dalan ka hasai parte husi trotoár tenki submete ba Ministériu Obras Públikas atu hetan autorizasaun hosi autoridade kompetente.
“Iha sidadaun balun mai husu atu loke dalan ba sira-nia loja. Maibé, se hakarak hasai trotoár, tenki halo karta ba Ministériu Obras Públikas. Se hetan autorizasaun, foin bele hasai; maibé se la hetan autorizasaun, labele hasai”, dehan Eligio José da Silva Marçal.
(alb)
