DILI, STLTIMORLESTE.com — Rosario de Marshall ne’ebé koñesidu ho naran Hercules iha Senayan, Jakarta, Indonézia, hala’o audiénsia ho Primeiru-Ministru (PM) Kay Rala Xanana Gusmão iha Palásiu Governu, Dili, Kinta (17/09/2026).
Hercules ne’ebé mai vizita Timor-Leste, aproveita oportunidade ne’e atu hasoru-malu no hala’o audiénsia ho PM Xanana Gusmão.
Rosario de Marshall mak Timor oan ne’ebé agora hela iha Indonézia no koñesidu liuhusi nia atividade iha Jakarta. Iha tempu liubá, nia naran asosia ho área Tanah Abang, Jakarta, antes nia muda ba atividade iha área organizasaun sosiedade sivil.
Agora, Hercules lidera organizasaun sosiedade sivil iha Indonézia ho naran Gerakan Rakyat Indonesia Bersatu (GRIB) Jaya.
Audiénsia entre Hercules no PM Xanana Gusmão ne’e mós sai oportunidade atu hametin interasaun entre Timor-Leste no sidadaun Timor oan sira ne’ebé hela no hala’o atividade iha rai-li’ur, liuliu iha Indonézia.
Iha parte seluk, Donanciano Soares, estudante Ensinu Superior iha Fakuldade Siénsia Polítika UNTL, apresia prezensa Hercules iha Timor-Leste no konsidera nia hanesan Timor oan ne’ebé iha direitu atu vizita rai ne’ebé nia moris fatin.
Nia dehan, maski Hercules agora hela iha Indonézia no iha sidadaun seluk, nia la haluha nia orijen no aproveita oportunidade atu vizita Timor-Leste no hasoru Xefe Governu.
“Hanesan Timor oan, Hercules iha direitu mai Timor-Leste tanba ne’e nia rai moris fatin. Ha’u apresia nia prezensa tanba nia bele vizita fali nia rai moris fatin no hasoru Xefe Governu,” dehan Donanciano.
Nia mós husu ba Timor oan sira ne’ebé hela iha rai-li’ur atu la haluha sira-nia rai moris fatin no kontinua tau matan ba Timor-Leste, nu’udar ezemplu ne’ebé Hercules hatudu liuhusi nia vizita.
(jos)
