DILI, STLTIMORLESTE.com – Komandante-Jerál Polísia Nasionál Timor-Leste (PNTL), Komisáriu Asistente Afonso dos Santos, propoin rekrutamentu ba feto na’in 150 atu aumenta partisipasaun feto iha instituisaun polísia.
Afonso dos Santos hato’o proposta ne’e iha nia diskursu durante serimónia iha CCD, Tersa (13/10/2026), ho énfaze ba profesionalizmu, disiplina no responsabilidade iha servisu polísia.
“Ha’u propoin atu rekruta feto na’in 150 hodi aumenta partisipasaun feto iha PNTL, maibé la’ós ida-ne’e de’it, hotu-hotu sei kontinua,” nia hatete.
Nia informa katak, Governu fó oportunidade ba PNTL atu hala’o rekrutamentu ba membru foun hamutuk 2.522, maibé prosesu ne’e sei hala’o tuir etapa.
Nia esplika katak, prosesu rekrutamentu ne’ebé hala’o daudaun seidauk remata, tanba teste iha munisípiu Díli rasik mós seidauk hotu.
“Ha’u rona katak iha rekrutamentu foun, foin na’in 30 mak halo teste. Munisípiu Díli rasik seidauk hotu. Ida-ne’e foin teste ida,” nia informa.
Komandante-Jerál subliña katak, rekrutamentu ba membru PNTL foun tenke hala’o ho transparénsia, justisa no tuir lei, diferente ho prátika sira iha tempu pasadu.
“Rekrutamentu polísia ne’e la haree ita-nia oan ka subriñu. Sé mak pasa teste, nia mak iha direitu atu tuir formasaun,” nia afirma.
Nia husu atu prosesu rekrutamentu hala’o ho responsabilidade, disiplina no profesionalizmu, hodi garante katak kandidatu sira ne’ebé pasa teste iha kualidade atu serve instituisaun.
Iha fatin ketak, akademista Universidade Nasionál Timor Lorosa’e (UNTL), Jenuinha do Carmo, apoia rekrutamentu ba feto barak liután iha PNTL.
Nia husu feto sira atu aproveita oportunidade rekrutamentu ne’e, prepara an ho di’ak no kompeti ho kandidatu seluk atu bele integra instituisaun polísia.
“Iha rekrutamentu pasadu mós fó prioridade ba feto, ho kuota 25%. Tanba ne’e, feto sira tenke aproveita oportunidade atu serve povu no nasaun,” nia afirma.
Jenuinha konsidera katak, partisipasaun feto iha PNTL importante atu promove igualdade jéneru no haforsa reprezentasaun feto iha instituisaun seguransa.
Entretantu, regulamentu kona-ba rekrutamentu PNTL publika iha Jornal da República, inklui Diploma Ministeriál N.º 35/2026 no nia alterasaun liuhusi Diploma Ministeriál N.º 39/2026.
(jen)
