DILI, STLTIMORLESTE.com – Situasaun overload iha Hospital Nasionál Guido Valadares (HNGV) agora kontroladu, maibé hospitál kontinua buka solusaun atu responde ba nesesidade pasiente sira.
Diretór Servisu Apoiu Diagnóstiku no Terapeútiku HNGV, Vidal de Jesus Lopes hato’o informasaun ne’e ba jornalista sira iha Bidau, Tersa-feira (13/10/2026).
Vidal hatete katak, situasaun overload iha HNGV la’ós problema foun, tanba ospitál kontinua buka solusaun no alternativa atu atende pasiente sira.
“Problema ne’e sai ona situasaun habitual iha ospitál, maibé HNGV kontinua buka solusaun no alternativa sira,” dehan Vidal.
Kona-ba kondisaun klimátika no poluisaun ar, nia hatete katak situasaun ne’e bele afeta saúde públika, liuliu sistema respiratóriu.
Nia esplika katak, poluisaun ar bele hamosu sintoma hanesan mear, inus metin no ulun moras, ne’ebé presiza atensaun husi servisu saúde públika.
Vidal hatete katak, prevensaun no edukasaun saúde públika presiza koordenasaun ho Direksaun Jerál Saúde, servisu saúde primária no Institutu Nasionál Saúde Públika.
“Bainhira ema moras no lori mai HNGV, ami nia knaar mak fó asisténsia médika,” nia afirma.
Nia apela ba komunidade atu kontinua aplika medida prevensaun hodi hamenus risku moras respiratóriu, liuliu durante períodu poluisaun ar.
Vidal rekomenda sidadaun sira atu uza máskara bainhira presiza, han hahán nutritivu no hemu bee natoon hodi mantein saúde.
Nia subliña katak, medida prevensaun importante atu hamenus risku sintoma respiratóriu ne’ebé bele mosu tanba poluisaun ar.
(dom)
