BAUCAU, STLTIMORLESTE.com – Klínika Veteranus Munisípiu Baucau rejista pasiente hamutuk na’in 3.668 durante fulan Jullu to’o Setembru 2026, iha ne’ebé infesaun respiratória aas liu iha klínika refere.
Koordenadór Klínika Veteranus Munisípiu Baucau, Elisiu Siquera Ximenes, esplika katak, husi totál pasiente na’in 3.668 ne’ebé hetan atendimentu durante períodu fulan tolu, veteranus husi Munisípiu Baucau hamutuk na’in 2.381, veteranus husi munisípiu seluk na’in 133, no komunidade jerál husi Baucau no munisípiu seluk hamutuk na’in 1.154.
“Tipu moras ne’ebé aas liu ita rejista iha ne’e mak infesaun respiratória, ho totál 1.017, tanba ita hatene katak bailoro no konstrusaun estrada agora lao hela,” Elisiu informa ba STL iha Klínika Veteranus, Riamere, Baucau, Kuarta (14/10/2026).
Nia relata katak, aleinde infesaun respiratória, klínika refere rejista mós moras pulmaun kroniku na’in 615, moras tensaun ran 532 no moras nehan 350.
Tipu moras seluk ne’ebé rejista mak moras kulit 164, moras tiroid 155, moras kanser 68, ran midar 64 no moras próstata na’in 42.
Elisiu esplika katak, moras sira ne’e bele iha kauza oioin, inklui mudansa klimatika, ezpozisaun ba poeira no kondisaun ambiente, hahalok moris loroloron, konsumu hahán ne’ebé la saudavel, fator jerasaun ka genétika, idade no problema iha funsionamentu órgaun isin nian.
Nia subliña katak, atu prevene moras no mantein saúde, pasiente sira presiza tau matan ba hahalok moris loroloron, inklui hili hahán ne’ebé saudavel no tuir orientasaun pesoál saúde.
Nia hatutan katak, durante konsultasaun, pesoál médiku no pesoál saúde sira la fó de’it aimoruk ba pasiente, maibé fó mós orientasaun kona-ba kuidadu saúde no hahán ne’ebé bele ajuda prevene moras.
Aleinde servisu konsultasaun, Klínika Veteranus Baucau mós halo transferénsia ba pasiente sira ne’ebé presiza tratamentu iha sentru saúde ka ospitál seluk, liuliu bainhira kondisaun saúde pasiente nian la permite kontinua hetan tratamentu iha klínika refere.
“Durante ne’e, ita mós hala’o transferénsia ba kazu referál ne’ebé presiza tebes. Bainhira pasiente to’o mai no ita haree katak nia kondisaun la di’ak, ita transfere kedas,” Elisiu dehan.
Entertantu husi fulan Jullu to’o Setembru 2026, klínika refere halo transferénsia ba pasiente veteranus na’in 84 no komunidade jerál na’in 59 ba Hospitál Rejionál Eduardo Ximenes Baucau, inklui kazu emerjénsia na’in hitu.
(tom)
