DILI, STLTIMORLESTE.com — Maski Governu aloka US$ 14 millaun ba kompra ai-moruk, INFPM rejista falta stok iha ítem 618 husi total 1.450, hodi hamosu kestaun kona-ba jestaun no prosesu kompra ai-moruk.
Komisaun F Parlamentu Nasionál husu Ministério Públiku (MP) no Komisaun Anti-Korupsaun (CAC) atu investiga Instituisaun Nasionál Farmásia no Produtus Médikus (INFPM), relasiona ho krize ai-moruk no suspeita irregularidade iha prosesu kompra.
Akadémista Universidade Nasionál Timor Lorosa’e (UNTL), Daniel de Araújo, apoia ezijénsia Komisaun F nian.
Tuir nia, investigasaun kle’an importante atu responde ba preokupasaun públiku kona-ba falta ai-moruk iha fasilidade saúde sira.
“Krize ai-moruk no irregularidade iha prosesu kompra labele kontinua akontese sein responsabilizasaun,” Daniel de Araújo dehan ba STL, iha Akait, Díli, Kuarta (14/10/2026).
Nia subliña katak setór saúde no jestaun fundu públiku presiza fiskalizasaun maka’as husi instituisaun kompetente sira, atu garante transparénsia no responsabilizasaun.
Daniel mós husu Governu no instituisaun estadu sira atu tau atensaun sériu ba situasaun ne’e, tanba falta ai-moruk bele prejudika sidadaun, liuliu família kiak ne’ebé depende ba servisu saúde públiku.
Iha parte seluk, observadór polítiku, José de Oliveira konsidera ezijénsia Komisaun F nu’udar pasu importante, tanba krize ai-moruk afeta diretamente atendimentu saúde públika.
“Hau hanoin Governu, liuhusi ministériu kompetente, tenke kolabora ho autoridade investigativa sira atu garante transparénsia iha futuru,” José de Oliveira dehan.
Nia husu MP no CAC atu hala’o investigasaun hodi klarifika prosesu kompra no jestaun ai-moruk iha INFPM, inklui suspeita irregularidade ne’ebé identifika durante fiskalizasaun.
Antes ne’e, Prezidente Komisaun F, Maria Gorumali Barreto, hateten katak fiskalizasaun komisaun nian identifika falta stock ai-moruk iha 43% husi ítem 1.450 ne’ebé rejista iha sistema INFPM.
Husi total ítem 1.450 ne’e, ítem 618 rejista stock out. Situasaun ne’e konsidera grave tanba bele afeta prestasaun servisu saúde no tratamentu ba pasiente sira iha sentru saúde no ospitál sira iha rai-laran.
Gorumali mós esplika katak prosesu sosa ai-moruk depende liu ba mekanizmu single source no kompra emerjénsia, duke uza prosesu kompra regular, tuir rezultadu fiskalizasaun komisaun nian.
Orsamentu Jerál Estadu aloka US$ 17 millaun ba INFPM, inklui US$ 14 millaun ba kompra ai-moruk. Maibé, mekanizmu kompra no jestaun osan ne’e presiza klarifikasaun liuhusi investigasaun.
“Osan ho montante boot aloka ba kompra, maibé ai-moruk ne’ebé simu iha kuantidade ki’ik, bazeia ba dokumentu ne’ebé ami hetan husi INFPM,” Maria Gorumali Barreto dehan.
(car)
