BAUCAU, STLTIMORLESTE.com – Pasiente moras tensaun ne’ebé hetan atendimentu iha Klínika Veteranus Munisípiu Baucau tenke sosa aimoruk rasik iha apotika, tanba klínika refere infrenta falta stok aimoruk.
Koordenadór Klínika Veteranus Munisípiu Baucau, Elisiu Siquera Ximenes, esplika katak, hahú husi fulan Agostu 2026, stok aimoruk ba pasiente moras tensaun iha klínika refere menus to’o remata, maski instituisaun ne’e halo ona pedidu emerjénsia ba dala tolu ba Institutu Nasionál Farmásia Produtu no Medikamentu (INFPM) Baucau, maibé la hetan resposta.
“Aimoruk ba moras tensaun fulan Agostu ikus nian to’o agora stok laiha. Pedidu emerjénsia ba SAMES dala tolu ona, maibé stok aimoruk mak laiha,” Elisiu informa ba STL iha Klínika Veteranus, Riamere, Baucau, kuarta-feira (14/10/2026).
Nia hatutan katak, antes ne’e, bainhira klínika enfrenta menus stok aimoruk, situasaun ne’e la liu loron rua to’o tolu, tanba aimoruk sira mai fali. Maibé, situasaun hahú muda husi fulan Agostu 2026, tanba to’o agora klínika seidauk hetan stok aimoruk sufisiente ba pasiente sira.
Aleinde aimoruk ba moras tensaun, klínika ne’e mós infrenta falta aimoruk clopsa ba trata kanek durante fulan rua ona. Tanba falta aimoruk refere, iha atendimentu balun, profisionál saúde sira uza aimoruk amoxilin nu’udar alternativa.
Elisiu esplika katak, ba pasiente moras tensaun, profisionál saúde sira labele troka aimoruk seluk sein konsiderasaun médika apropriada. Tanba ne’e, pasiente sira tenke simu reseita ba sosa aimoruk iha apotika hodi kontinua tratamentu.
Nia hateten katak, situasaun ne’e hamosu preokupasaun, tanba pasiente sira tenke uza osan rasik sosa aimoruk ne’ebé normalmente hein atu hetan husi klínika. Pasiente sira mós hato’o ona preokupasaun ne’e ba Konsellu Munisípal Kombatentes Libertasaun Nasionál Baucau.
Tuir Elisiu, parte klínika nian dirije ona pedidu ba INFPM Baucau atu asegura fornese aimoruk ba pasiente sira, maibé to’o agora seidauk iha rezultadu ne’ebé bele rezolve falta aimoruk refere.
“Realidade ne’ebé mak ita tenke ko’alia, pasiente tenke hola atu nune’e kontinua sira-nia konsumu ne’e, labele para. Ita hein para Estadu haree hela asuntu sira ne’e, tanba povu iha mak Estadu iha. Ita-nia povu dezaraska ona, ita hanesan servidor Estadu tenke tau matan ba ita-nia povu,” nia dehan.
Elisiu informa katak, durante fulan Jullu to’o Setembru 2026, Klínika Veteranus Munisípiu Baucau rejista pasiente moras tensaun hamutuk ema na’in 532. Maibé falta aimoruk bele afeta grupu pasiente ne’ebé presiza kontinua tratamentu.
Tanba ne’e husu INFPM Baucau atu fó resposta ba pedidu fornese aimoruk ba moras tensaun no aimoruk seluk ne’ebé klínika presiza, hodi nune’e pasiente sira bele hetan atendimentu no tratamentu tuir nesesidade.
Atu hetan klarifikasaun kona-ba razaun falta stok aimoruk no medida ne’ebé INFPM Baucau sei foti atu rezolve problema ne’e, STL bá hasoru responsável instituisaun refere iha edifísiu INFPM, Uatulete, Baucau, atu husu komentáriu. Maibé, responsável refere la fó komentáriu bainhira STL hato’o asuntu ne’e ba entrevista.
(tom)
