DILI, STLTIMORLESTE.com – Adjuntu Xefe Estadu Maior F-FDTL, Koronel Tirosinado Mario Baptista “Bersama”, loke workshop seguransa sibernétika atu hametin kapasidade militár sira iha era dijitál.
Xefe Estadu Maior Jeneral FALINTIL – Forsa Defeza Timor Leste (F-FDTL), Tenente Jenerál Domingos Raúl “Falur Rate Laek” neebe Reprezenta husi Adjuntu Xefe Estadu Maior F-FDTL, Koronel Tirosinado Mario Baptista “Bersama”, loke ofisialmente workshop seguransa sibernétika iha Auditóriu Kuartél Jenerál Fatuhada.
Iha atividade ne’e organiza husi Divizaun Komunikasaun no Sistema Informasaun (D6), ho apoiu Defence Cooperation Program (DCP) Austrália no fasilitasaun SIMILIC.
Workshop ne’e nia objetivu mak hasa’e koñesimentu, komprensaun no kapasidade membru militár sira kona-ba seguransa sibernétika no utilizasaun teknolojia ho seguru.
Adjuntu Xefe Estadu Maior F-FDTL, Koronel Tirosinado Mario Baptista “Bersama”hateten katak, workshop ne’e reflete intensaun Komandu F-FDTL atu hasa’e koñesimentu militár sira kona-ba ameasa dijitál.
“Komprensaun ne’ebé kle’an kona-ba ameasa sibernétika hau hatete bele ajuda hamenus risku ba individu, sistema informátiku no instituisaun F-FDTL,” hatete Adjuntu Xefe Estadu Maior F-FDTL, Koronel Tirosinado Mario Baptista “Bersama” ba jornalista sira liu husi nia deskurus iha Kuartel Jeneral F-FDTL Fatuhada Dili, Kinta (15/10/2026).
Iha fatin hanesan, Xefe D6, Major Transmisaun Joanico Cesário Belo informa katak, utilizasaun telemóvel, komputadór, internet no sistema komunikasaun sai parte importante iha atividade loroloron.
Nia koalia, teknolojia mós lori ameasa sibernétika, inklui na’ok dadus pesoál, asesu la autorizadu ba sistema interna, fraude dijitál no divulgasaun informasaun konfidensiál.
Nia informa katak, membru F-FDTL tenke uza teknolojia ho kuidadu, proteje informasaun institusionál no evita asaun ne’ebé bele kompromete seguransa sistema informátiku.
Nia hatutan, Líder Ekipa DCP Austrália, Major Chloe Pinheiro, haktuir katak seguransa sibernétika la’ós de’it asuntu tékniku, maibé mós iha relasaun direta ho seguransa nasionál no protesaun operasionál.
Nia husu membru F-FDTL ida-idak atu responsabiliza an ba protesaun fronteira dijitál, liuhusi utilizasaun sistema no teknolojia ho seguru.
Nunee mos Major Chloe Pinheiro mós agradese ba lideransa F-FDTL nia apoiu no apresia partisipasaun membru militár sira iha workshop ne’e.
(jen)
