DILI, STLTIMORLESTE.com –Komando Polísia Nasionál Timor-Leste (PNTL) husu Estadu atu hametin kapasidade instituisaun seguransa no defeza nian hodi responde ba ameasa dijitál.
Segundo Komandante-Jerál Polísia Nasionál Timor-Leste (PNTL), Komisáriu Asistente Natersia Eufrasia Soares Martins, hatete katak teknolojia dijitál bele fó benefísiu, maibé bele mós uza hodi komete krime.
Nia esplika katak, inteligência artifisiál (AI) no drone bele hamosu ameasa foun ba seguransa públika, se instituisaun kompetente sira la iha kontrolu no kapasidade atu responde.
“Teknolojia kontinua dezenvolve lalais. AI bele uza ba buat di’ak, maibé bele mós uza hodi komete krime no drone bele estraga ema,” hatete Segundo Komandante-Jerál PNTL, Komisáriu Asistente Polísia Natersia Eufrasia Soares Martins ba jornalista sira iha Sentru Formasaun Polísia (SFP) Comoro Dili, Kinta (15/10/2026).
Nia subliña katak Estadu presiza hanoin ba oin no investe iha instituisaun seguransa no defeza atu hasoru risku sira ne’ebé teknolojia foun lori.
Nia afirma katak, hametin rekursu umanu, ekipamentu no kapasidade téknika importante atu garante seguransa nasaun no proteje sidadaun sira iha era dijitál.
Tanba ne’e, PNTL no instituisaun defeza presiza hetan apoiu no investimentu adekuadu atu aumenta prontidaun no kapasidade operasionál hodi defende nasaun.
Iha fatin ketak, Akademista UNTL José Costantino Ximenes esplika, Institutusaun PNTL tenke uza era dijital, tanba teknolojia dijitál bele fó benefísiu, maibé bele mós uza hodi komete krime.
“Hau atu hatete katak, ita nia polísia sira iha era dijital ida nee, sira tenke uza teknolojia dijitál, tanba ida nee fó benefísiu, maibé bele mós uza hodi komete krime,” nia afirma.
(jen)
