BAUCAU, STLTIMORLESTE.com – Sentru Saúde Quelicai tenke jere no poupa stok aimoruk ne’ebé disponivel atu responde ba nesesidade pasiente sira.
Relasiona informasaun menus stok aimoruk iha Nasionál, Xefe Sentru Saúde Quelicai, Domingos Boavida, informa katak menus aimoruk ne’e seidauk hamosu impaktu diretu ba atendimentu saúde iha sentru saúde Quelicai, maibé situasaun ne’e kontinua sai preokupasaun, tanba aimoruk nu’udar elementu importante atu trata moras pasiente sira.
“Iha sentru saúde Quelicai atendimentu la’o normál. Kona-ba aimoruk ne’e loos, item balu menus, hanesan grupu antibiótiku, hanesan Amoxicillin, Cloxacillin no seluk tan. Bainhira aimoruk ida iha grupu ne’e laiha, ita tenke uza aimoruk seluk ne’ebé disponivel iha grupu refere,” Domingos Boavida hateten ba liuhusi telefone, Kinta (15/10/2026).
Nia hatutan katak, maski aimoruk paracetamol disponivel, pesoál saúde tenke jere uza aimoruk ne’e ho kuidadu, liuliu ba labarik sira ne’ebé mai hetan tratamentu tanba isin manas.
“Hanesan paracetamol, bainhira labarik mai isin manas, ita tenke jere ho kuidadu. Ita avalia uluk nia kondisaun, depois mak fó aimoruk tuir nesesidade,” nia dehan.
Domingos Boavida afirma katak stok aimoruk ne’ebé disponivel seidauk sufisiente atu responde ba nesesidade pasiente sira hotu. Tanba ne’e, sentru saúde tenke buka dalan atu jere stok ne’ebé iha, atu garante katak pasiente sira ne’ebé presiza tratamentu bele hetan atendimentu.
Nia mós hateten katak, antes stok aimoruk hotu, sentru saúde halo ona planu atu asegura aprovizionamentu foun, hodi evita interrupsaun iha atendimentu saúde.
“Ita nia aimoruk ne’e, antes atu hotu, ita halo ona planu atu hetan stok foun molok aimoruk iha sentru saúde hotu,” nia afirma.
Ho situasaun ne’e, Xefe Sentru Saúde Quelicai husu Servisu Munisipál Saúde Baucau atu buka dalan no solusaun atu rezolve problema menus aimoruk, hodi asegura disponiblidade aimoruk ba tratamentu pasiente sira.
Atu hetan klarifikasaun kona-ba problema menus aimoruk ne’e, STL koko ona atu konfirma ho Diretór Servisu Munisipál Saúde Baucau, maibé to’o notísia ne’e públika, seidauk hetan komentáriu husi parte refere.
Entertantu Sentru Saúde Quelicai nia área kobertura ba suku 15 kompostu Suku sira iha Postu Administrativu Quelicai, Quelicai Antigu no Matebian.
(tom)
