SAME, STLTIMORLESTE.com – Xefe Estadu Maior Jenerál FALINTIL-Forsa Defeza Timor-Leste (F-FDTL), Tenente-Jenerál Domingos Raul “Falur Rate Laek”, partisipa iha serimónia Loron Internasionál Labarik Feto iha Manufahi.
Liu husi Komunikadu Impresa ne’ebe STL asesu iha media F-FDTL katak iha loron kuarta (14/10/2026) katak, Xefe Estadu Maior Jenerál FALINTIL-Forsa Defeza Timor-Leste (F-FDTL), Tenente-Jenerál Domingos Raul “Falur Rate Laek”, reprezenta husi Xefe Gabinete, Koronél Marcelino Ximenes “RIZAI” neebe Serimónia ne’e hala’o iha Salaun Párokia Same Vila, Munisípiu Manufahi, ho organizasaun husi Plan Internasionál Timor-Leste.
Iha atividade ne’e uza tema “Klima Muda, Moris Muda: Avansu Saúde no Direitu Seksuál no Reprodutivu ba Labarik Feto sira”.Tema ne’e foka ba impaktu mudansa klima nian ba labarik feto sira, liuliu iha área saúde no direitu seksuál no reprodutivu.
Depois atividade ne’e, organizadór sira fahe sertifikadu ba labarik feto no feto foin-sa’e sira ne’ebé partisipa iha programa Girls Takeover (GTO).
Programa GTO fó oportunidade ba feto foin-sa’e sira atu asume papél lideransa iha instituisaun sira durante oras ida.
Programa ne’e mós ajuda partisipante sira atu komprende ambiente servisu, dezenvolve kapasidade lideransa, no hato’o hanoin no preokupasaun.
Liuhusi inisiativa ne’e, labarik feto no feto foin-sa’e sira bele hametin konfiansa-an no buka oportunidade atu atinje sira-nia mehi no aspirasaun futuru.
Partisipasaun reprezentante F-FDTL nian hatudu prezensa instituisaun militár iha atividade ne’ebé promove direitu, saúde, edukasaun no dezenvolvimentu lideransa ba labarik feto no feto foin-sa’e sira iha Timor-Leste.
(jen)
