BAUCAU, STLTIMORLESTE.com – Estudante hamutuk na’in 5.131 husi ensinu báziku terséiru siklu, ensinu sekundáriu jerál no ensinu tékniku-vokasionál iha Munisípiu Baucau sei partisipa iha ezame nasionál no lokál, ne’ebé sei hahú iha semana oin.
Diretór Servisu Munisipál Edukasaun (SME) Baucau, Afonso dos Santos da Costa, informa katak preparasaun ba ezame nasionál no lokál hahú ona, liuhusi koordenasaun no fahe responsabilidade ba ekipa sira atu halo observasaun no monitorizasaun iha sentru ezame hamutuk 73.
Sentru ezame hirak ne’e kompostu husi ensinu báziku terséiru siklu hamutuk 43, ensinu sekundáriu jerál 27 no ensinu tékniku-vokasionál lima.
Estudante na’in 5.131 ne’ebé sei partisipa iha ezame ne’e kompostu husi estudante ensinu báziku terséiru siklu na’in 2.594, ho mane na’in 1.258 no feto na’in 1.336.
Ensińu sekundáriu jerál rejista estudante na’in 2.311, kompostu husi mane na’in 1.027 no feto na’in 1.284. Enkuantu, ensinu tékniku-vokasionál iha estudante na’in 226, kompostu husi mane na’in 111 no feto na’in 115.
“Preparasaun ba ezame nasionál iha Baucau, ohin ami kordena no fahe servisu ba malu atu ba observa sentru realizadór sira, oinsá komunikasaun servisu entre diretiva ho diresaun, inklui inspesaun bainhira implementa ezame ida-idak atu lao tuir nia serbisu,” Afonso informa ba jornalista sira iha Vila Nova, Baucau, Kinta (15/10/2026).
Nia esplika katak ekipa sira sei iha responsabilidade atu observa preparasaun iha sentru ezame ida-idak, inklui koordenasaun entre estrutura diretiva no direksaun eskola, hodi identifika no rezolve problema ne’ebé bele mosu antes ka durante prosesu ezame.
Afonso hateten katak ezame nasionál la’ós de’it atu sukat rezultadu akademiku estudante sira, maibé mós oportunidade atu hatudu sira-nia esforsu, disiplina no preparasaun durante prosesu aprendizajen.
Tanba ne’e, nia enkoraja estudante sira atu fiar ba sira-nia kapasidade, halo ezame ho onestidade, no responde pergunta sira ho kalma no atensaun.
SME Baucau mós husu estudante sira atu prepara an ho di’ak, estuda matéria ne’ebé manorin sira hanorin ona, organiza tempu aprendizajen no toba ho sufisiente antes loron ezame.
Afonso hatutan katak preparasaun sira iha nivel munisipál hala’o ona, no agora SME Baucau hein distribuisaun materiál ezame husi nivel nasionál.
“Preparasaun sira hotu orseik no agora ita hein distribuisaun materiál ezame husi nasionál. Ita-nia espetativa mak hakarak ezame nasionál no lokál hala’o ho susesu. Importante asegura estudante sira partisipa masimu,” nia afirma.
Ezame nasionál iha Munisípiu Baucau sei hala’o durante loron tolu, hahú husi Segunda-feira, 19 to’o Quarta-feira, 21 Outubru 2026. Depois, prosesu sei kontinua ho ezame lokál ne’ebé sei hala’o tuir kalendáriu ne’ebé autoridade edukasaun determina.
(tom)
