VIQUEQUE, STLTIMORLESTE.com – Xefe Estadu Maior Jenerál F-FDTL, Tenente-Jenerál Domingos Raúl “Falur Rate Laek” afirma, Uma Lisan Uma Mau Besi simboliza unidade, identidade no memória luta libertasaun Timor-Leste.
Liu husi Komunikadu Impresa ne’ebe STL asesu iha media F-FDTL katak,iha serimónia ne’e, Xefe Estadu Maior Jenerál F-FDTL, Tenente-Jenerál Domingos Raúl “Falur Rate Laek”, asina plaka inaugurasaun, nu’udar símbolu rekonhesimentu ba patrimóniu kulturál no istóriku komunidade lokál.
Nia dehan, Uma Lisan Uma Mau Besi la’ós de’it konstrusaun foun, maibé símbolu dignidade, identidade no memória istórika povu Timor-Leste.
“Hau atu dehan durante luta rezisténsia, uma lulik no uma lisan sira sai fatin abrigu, proteksaun no fonte forsa ba guerrilleiru FALINTIL, liuliu iha rejiaun kosteira,”hatete Xefe Estadu Maior Jenerál F-FDTL, Tenente-Jenerál Domingos Raúl “Falur Rate Laek”, ba jornalista iha Knua Weekaen, Aldeia Aina-Uain, Suku Uma Ki’ik, Postu Administrativu Viqueque, Munisípiu Viqueque sabadu (17/10/2026).
Nia esplika, fatin sira-ne’e mós hametin ligasaun entre Frente Armada, Frente Klandestina, Igreja Katólika no jornalista sira, ne’ebé kontribui hodi lori luta libertasaun Timor-Leste ba komunidade internasionál.
Maski invadór sira sunu no estraga patrimóniu kulturál barak, Falur Rate Laek afirma katak sira la konsege halakon identidade no espíritu unidade povu Timor-Leste.
Nia subliña katak, unidade no solidariedade povu nian sai forsa importante ne’ebé kontribui ba vitória luta libertasaun no ukun-rasik-an.
Iha era ukun-rasik-an, nia husu atu Uma Lisan Uma Mau Besi sai fatin enkontru entre jerasaun katuas no joven sira, hodi fahe koñesimentu no transmite istória luta.
Nia apela ba katuas-ferik sira atu kontinua transmite esperiénsia ba joven sira, no ba joven sira atu aprende no komprende sakrifísiu ne’ebé povu halo atu hetan liberdade.
Falur Rate Laek mós enfatiza katak Uma Lisan Uma Mau Besi tenke sai espasu rekonsiliasaun, konsiliasaun no unidade, hodi hametin dame no respeitu malu iha komunidade.
“Defende Timor-Leste signifika mós defende ita-nia kultura, identidade, tradisaun no patrimóniu istóriku,” mak nia mensajen ba komunidade,” nia Informa.
Iha rohan, Xefe Estadu Maior Jenerál F-FDTL hato’o agradesimentu ba lia-na’in, komunidade Beobe, veteranu no joven sira ne’ebé kontribui ba konstrusaun no preservasaun Uma Lisan Uma Mau Besi.
Nia enkoraja joven sira atu hametin abut kulturál no kontinua preserva patrimóniu ne’e, atu identidade no istória povu Timor-Leste nian moris nafatin ba jerasaun tuirmai.
Nia apela ba joven sira atu nafatin hametin ligasaun ho uma lulik no kultura, tanba istória povu Timor-Leste nian iha abut metin iha foho no komunidade sira, ne’ebé sai parte importante hosi luta libertasaun nasionál.
(jen)
