AUSTRÁLIA, STLTIMORLESTE.com — Prezidente Repúblika (PR), José Ramos-Horta husu traballadór Timoroan iha Austrália atu serbisu ho disiplina, evita krime no la envolve an iha politika partidária.
Ramos-Horta hato’o apelu ne’e ba jornalista sira iha Austrália, sábadu (17/10/2026), no enkoraja traballadór Timoroan atu aproveita oportunidade serbisu ne’ebé sira hetan.
“Ba traballadór sira ne’ebé sorte hetan serbisu iha Austrália, serbisu ho disiplina no labele envolve an iha partidu polítiku Timor nian,” dehan Prezidente.
Nia hatete katak ema barak buka oportunidade serbisu iha rai-li’ur, tanba ne’e, sira ne’ebé hetan ona oportunidade tenke uza tempu ho di’ak atu hetan rendimentu no sustenta família.
Prezidente mós enkoraja traballadór sira atu aprende esperiénsia no koñesimentu durante servisu iha Austrália, atu bele aplika fali bainhira fila ba Timor-Leste.
Nia husu Timoroan sira atu la envolve an iha grupu arte marsiais ka atividade sira ne’ebé bele hamosu konflitu no fahe komunidade.
“Imi mai buka osan atu haruka ba família no mai atu estuda. Labele envolve an iha partidu polítiku Timor nian,” dehan Ramos-Horta.
Nia esplika katak Timoroan sira bele halo opsaun polítika tuir sira-nia konsiénsia bainhira fila ba Timor-Leste no partisipa iha eleisaun, la ho nesesidade atu fahe malu tanba diferensa polítika.
Prezidente mós relata katak maioria Timoroan sira iha rai-li’ur hatudu hahalok ne’ebé di’ak, maibé iha kazu balun ne’ebé envolve problema ho lei, inklui iha Reinu Unidu.
Tanba ne’e, nia apela ba embaixada no konsuladu Timor-Leste atu ko’alia ho sidadaun sira ne’ebé envolve iha krime, no husu atu prosesu justisa tuir lei nasaun ne’ebé kazu ne’e akontese.
Ramos-Horta mós husu Timoroan sira iha Austrália atu sai reprezentante di’ak ba nasaun, hodi hatudu hahalok pozitivu, respeitu lei no kontribui ba komunidade.
Iha oportunidade ne’e, Prezidente enkoraja estudante Timoroan sira iha Austrália atu kontinua aprende no la tauk enfrenta kompetisaun internasionál.
Nia refere ba estudante Timoroan ida ne’ebé, tuir informasaun ne’ebé nia temi, hetan pozisaun kuartu iha kompetisaun matemátika internasionál.
(eme)
