SYDNEY, STLTIMORLESTE.com — Prezidente Repúblika (PR), José Ramos-Horta simu konvite husi nasaun oin-oin atu promove Timor-Leste no fahe esperiénsia nasaun nian ba mundu.
Iha entrevista ho jornalista sira iha Hotel Fullerton, Sydney, sábadu (17/10/2026), Ramos-Horta hatete katak nasaun barak hakarak aprende husi esperiénsia Timor-Leste, maski nasaun ki’ik.
Nia dehan katak konvite sira ne’e mai husi governu no universidade, inklui nasaun sira iha Mediu Orienti, Israel, no Estadus Unidus.
“Ha’u simu konvite husi rai hotu-hotu. Sira hakarak hatene Timor-Leste nia esperiénsia,” dehan Ramos-Horta ho hamnasa.
Prezidente hatete katak nia simu ona konvite internasionál barak, inklui bainhira nia servisu nu’udar Ministru Negósiu Estranjeiru, molok sai Xefe Estadu.
Nia esplika katak objetivu viajen diplomátika sira mak atu promove Timor-Leste, mobiliza apoiu internasionál no fahe esperiénsia luta ba ukun rasik-an.
Ramos-Horta hatete katak, Timor-Leste nia luta ba independénsia, ne’ebé akompaña ho sakrifísiu boot, sai esperiénsia importante ba komunidade internasionál.
Nia mós subliña katak, Timor-Leste konsege harii relasaun di’ak ho Indonézia no Austrália, maski iha istória konflitu no luta ba independénsia.
Tuir Prezidente, Primeiru-Ministru Xanana Gusmão iha papél importante tebes iha prosesu rekonsiliasaun, estabilidade polítika no hametin relasaun entre Timor-Leste ho Indonézia.
“Xanana Gusmão mak salva Timor-Leste,” dehan Ramos-Horta, bainhira ko’alia kona-ba lideransa no kontribuisaun Xanana ba nasaun.
Prezidente afirma katak, relasaun entre Timor-Leste ho Indonézia agora metin, ho sidadaun husi nasaun rua bele vizita malu ho liberdade.
Nia mós rejeita persepsaun katak nia mak figura prinsipál iha prosesu ukun rasik-an, no hateten katak nia hala’o polítika ne’ebé Xanana Gusmão dezenvolve.
Ramos-Horta konsidera katak esperiénsia Timor-Leste, liuliu luta ba independénsia no rekonsiliasaun ho nasaun viziñu, kontinua sai lisaun importante ba mundu.
(eme)
