DILI, STLTIMORLESTE.com- Sentru Formasaun Polísia Nasional Timor-Leste (PNTL) hala’o formasaun baziku ba funsionáriu Imigrasaun na’in-63 durante fulan ida, atu hametin kapasidade, dixiplina no kualidade servisu.
Tuir Reprezentante Ministériu Interiór (MI) Constantino Godinho hatete, formasaun ne’e kobre Lei Imigrasaun, aziaun no prosedimentu legál, inklui matéria sira ne’ebé relevante ba responsabilidade funsionáriu iha atendimentu públiku.
Nia hateten katak, formasaun ne’e importante atu funsionáriu sira hala’o knaar tuir regra no prosedimentu ne’ebé vigora.
Nia dehan katak, iha era dijitál, funsionáriu Imigrasaun presiza iha koñesimentu atu uza sistema dijitál, liuliu iha jestaun dadus no atendimentu ema tama-sai Timor-Leste.
“Formasaun ida-ne’e importante atu eleva kualidade servisu, liuliu atu funsionáriu hatene jere dadus ho loos no hala’o servisu tuir lei,” hatete Reprezentante Ministériu Interiór (MI) Constantino Godinho ba jornalista sira iha Sentru Formasaun Polísia (SFP) Comoro Dili, Segunda-feira (19/10/2026).
Nia aumenta katak, formasaun ne’e la’ós de’it kona-ba lei no prosedimentu, maibé inklui preparasaun fízika atu funsionáriu sira kumpre responsabilidade.
Godinho esplika katak, partisipante sira mai husi instituisaun relevante no hetan orientasaun husi formadór ne’ebé iha koñesimentu iha área ida-idak.
Nia hateten katak, formasaun ne’e destina ba funsionáriu foun no funsionáriu ne’ebé servisu ona, inklui funsionáriu kazuál no kontratadu ne’ebé seidauk hetan formasaun estruturada.
Tanba ne’e, nia husu ba partisipante sira atu kumpre regra no oras formasaun, no aprende ho seriedade atu bele aplika koñesimentu iha fatin servisu.
Iha parte seluk, Komandante Sentru Formasaun PNTL, Superintendente Polísia Basílio de Jesus, hateten katak programa ne’e organiza husi Servisu Imigrasaun, ho apoiu Organizasaun Internasionál ba Migrasaun (IOM).
Nia esplika katak, Sentru Formasaun PNTL hala’o programa ne’e tuir matéria ne’ebé Servisu Imigrasaun prepara no husu, ho objetivu atu hametin kapasidade funsionáriu na’in-63.
Basílio de Jesus hateten katak, kuríkulu formasaun inklui mekanizmu uza forsa, direitus umanus, investigasaun polisionál, étika, komunikasaun iha atendimentu públiku no intelijénsia.
Matéria adisionál sei dezenvolve mós karakterístika no dixiplina partisipante sira, atu bele kumpre responsabilidade no hala’o servisu ho profisionalizmu.
Komandante ne’e subliña katak, partisipante sira tenke kumpre regra no prosedimentu sentru formasaun nian, no evita atividade ne’ebé kontra orientasaun ofisiál.
Iha oportunidade ne’ebá, Komisáriu Komisaun Funsaun Públika, José Telo Soares, aviza partisipante sira atu la konsidera formasaun ne’e hanesan garantia atu hetan estatutu funsionáriu permanente.
Nia esplika katak, estatutu permanente ka nomeasaun ba ajente depende ba prosedimentu no regra legál ne’ebé vigora, enkuantu objetivu formasaun mak hametin dixiplina no kapasidade.
Nunee mos husi Komisaun Funsaun Públika (KCP) José Telo Soares deklara katak, Komisaun Funsaun Públika bele loke prosesu relevante, maibé kona-ba salariu funsionáriu kazuál, instituisaun ne’e bele rekomenda ba Ministériu Finansas atu avalia tuir lei.
Nia husu ba partisipante sira atu aproveita oportunidade formasaun durante fulan ida, hodi hadi’a dixiplina, atitude no responsabilidade iha servisu.
Nia afirma katak, funsionáriu sira tenke hatudu mudansa pozitivu iha hahalok no atitude, atu sai servidor públiku profisionál no fó atendimentu di’ak ba públiku.
(jen)
