BAUCAU, STLTIMORLESTE.com — Estudante na’in rua (2) iha Munisípiu Baucau la konsege tuir ezame nasionál iha loron dahuluk, tanba moras.
Diretór Servisu Munisipál Edukasaun Baucau, Afonso dos Santos da Costa esplika katak, husi estudante na’in rihun lima resin ne’ebé rejistu tuir ezame nasionál husi Ensinu Báziku Terseiru Siklu, Ensinu Sekundáriu Jerál no Ensinu Tékniku-Vokasionál, iha estudante na’in rua mak la marka prezensa iha loron dahuluk.
“Ezame nasionál loron dahuluk ne’e, ita hetan informasaun katak estudante na’in rua mak la partisipa tanba moras. Ida husi EBF Buruma, feto, no ida seluk husi ESJ Filial Laisorolai, Postu Matebian, mane,” Afonso hateten ba jornalista sira iha Vila Nova, Baucau, Segunda-feira (19/10/2026).
Nia hatutan katak, estudante sira ne’e bele kontinua tuir ezame iha loron tuirmai bainhira sira nia kondisaun saúde di’ak ona, maibé bainhira haree kondisaun sei moras sei hetan oportunidade atu tuir fali ezame iha segundu emisaun iha tempu besik.
Afonso mós husu ba estudante sira atu tau matan ba saúde, liuliu durante períodu ezame nasionál, no evita toba tarde atu bele prepara an ho di’ak ba ezame iha loron sira tuirmai.
“Husu ba estudante sira no inan-aman sira atu haree ba sira nia oan ne’ebé tuir ezame. Ita hotu presiza kolabora atu fó hanoin ba sira katak tenke toba sedu, atu prepara an ba loron hirak ne’e no bele tuir ezame ho di’ak,” nia rekomenda.
Afonso informa katak, Munisípiu Baucau prepara sentru ezame nasionál hamutuk 73, kompostu husi sentru Ensinu Báziku hamutuk 43, Ensinu Sekundáriu Jerál 27 no Ensinu Tékniku-Vokasionál lima.
Enkuantu númeru estudante ne’ebé rejistu tuir ezame nasionál hamutuk 5.131, ho kompozisaun hanesan Ensinu Báziku, iha estudante na’in 2.594, kompostu mane 1.258 no feto 1.336. Ensinu Sekundáriu Jerál iha estudante na’in 2.311, kompostu mane 1.027 no feto 1.284. Ensinu Tékniku-Vokasionál iha estudante na’in 226, kompostu mane 111 no feto 115.
Atu asegura prosesu ezame la’o ho orden no evita estudante sira halo kopia, Servisu Munisípal Edukasaun Baucau akumula estudante kada sala ezame limita to’o na’in 20, ho distánsia entre estudante ida ba ida husi metru ida to’o rua no akompaña husi vizilante na’in rua.
“Objetivu kria distánsia ne’e atu estudante sira labele konversa malu ka haree ba estudante sira seluk iha oin, kotuk no sorin-sorin,” Afonso esplika.
Entretantu ezame nasionál loron dahuluk iha Munisípiu Baucau la’o ho di’ak, tanba hetan apoiu masimu husi entidades hotu.
(tom)
