PERTH, AUSTRÁLIA, STLTIMORLESTE.com —
Prezidente Repúblika (PR), Jose Ramos Horta Global Citizen Summit 2026 iha Perth Australia.
Prezidente Repúblika Timor-Leste, José Ramos-Horta hato’o diskursu husu atu aumenta apoiu finanseiru ba adaptasaun no kombate mudansa klimátika iha Global Citizen NOW Perth Summit 2026, Segunda-feira (19/10/2026), antes Konferénsia Klimátika Nasoins Unidas (COP31).
Simeira ne’e hala’o iha Perth Convention and Exhibition Centre, Austrália Osidentál, hodi hametin kolaborasaun entre líder governamentál, setór privadu, organizasaun filantrópika, komunidade indígena, akademiku no sosiedade sivíl atu avansa solusaun ba tranzisaun enerjétika no reziliénsia klimátika.
Iha diskursu ne’e, Ramos-Horta subliña katak komunidade internasionál presiza foti asaun konkretu no aumenta investimentu atu responde ba impaktu mudansa klimátika, liuliu ba nasaun vulnerável sira hanesan Timor-Leste.
“Ba mudansa klimátika, presiza adaptasaun. Iha ona tinan barak nia laran, no ita presiza husu an rasik saida mak komunidade internasionál halo ona atu ajuda rai no komunidade sira,” nia hateten.
Prezidente hateten katak, Global Citizen NOW Perth Summit sai plataforma importante ida atu diskute dezafiu globál sira, inklui seguransa enerjétika, reziliénsia klimátika no tranzisaun ba futuru sustentável.
Tuir Ramos-Horta, Timor-Leste nu’udar nasaun vulnerável ba mudansa klimátika, presiza apoiu no parseria internasionál atu garante independénsia enerjétika, estabilidade rejionál no tranzisaun justu ba ema hotu.
Hametin parseria internasionál
Simeira ne’e halibur líder governu, reprezentante setór emprezarial, organizasaun filantrópika, komunidade indígena, akademiku no sosiedade sivíl atu hametin kolaborasaun, anuncia kompromisu foun no mobiliza investimentu.
Objetivu prinsipál mak habelar asesu ba enerjia moos, aselera eletrifikasaun, hametin seguransa enerjétika no apoia dezenvolvimentu sustentável, antes COP31.
Iha Segunda-feira, Ramos-Horta partisipa iha sesaun diskusaun ho títulu “Enerjia, Seguransa no Independénsia”, ne’ebé Tzeporah Berman, Prezidente Tratadu Naun-Proliferasaun Kombustível Fóssil, modera.
Entre oradór sira ne’ebé anunsia ba eventu ne’e mak Primeiru-Ministru Antígua no Barbuda, Gaston Browne; Premier Austrália Osidentál, Roger Cook; eis-Primeiru-Ministru Austrália, Kevin Rudd; no Diretór Ezekutivu Ajénsia Enerjia Internasionál, Fatih Birol.
Vise-Sekretária-Jerál Nasoins Unidas, Amina J. Mohammed, mós programa atu hato’o diskursu liuhosi vídeo. Eventu ne’e promove kolaborasaun entre governu, empreza no sosiedade sivíl atu aselera tranzisaun enerjétika globál.
Ramos-Horta hateten katak, nia sente kontente atu hamutuk ho líder sira, inklui eis-Prezidente Kiribati, Anote Tong, no reprezentante sira husi setór oioin, atu diskute solusaun ba dezafiu klimátiku no enerjétiku.
Prezidente subliña katak, esforsu internasionál tenke tradús ba asaun konkretu, liuliu apoiu finanseiru, investimentu no programa ne’ebé bele ajuda komunidade sira ne’ebé sofre impaktu mudansa klimátika.
Ba Timor-Leste, prioridade mak hametin reziliénsia klimátika, dezenvolve asesu ba enerjia sustentável no asegura katak tranzisaun enerjétika fó benefísiu ba populasaun tomak.
(eme)
