DILI, STLTIMORLESTE.com — Jurista Sérgio Dias Quintas husu ekipa júri publika nota kandidatu sira ne’ebé konkore ba vaga iha Tribunal Rekursu (TR).
Ekipa júri publika ona rezultadu kandidatu majistradu na’in 22 ne’ebé konkore ba vaga iha Tribunal Rekursu (TR). Husi númeru ne’e, na’in 17 hetan estatutu Apto, enkuantu na’in 5 hetan estatutu Não Apto.
Kandidatu na’in 17 ne’ebé hetan estatutu Apto mak Albertina da Conceição das Neves, Ana Paula Fonseca Monteiro de Jesus, Antonio Helder Viana do Carmo, António José Fonseca Monteiro de Jesus, Arjentino Luisa Nunes, Edite Palmira dos Reis, Ersília de Jesus no Francisca Marques Cabral.
Kandidatu seluk ne’ebé hetan estatutu Apto mak Hugo da Cruz Pui, Ivan José Suritai Patrocino António, João Ribeiro, José Maria de Araújo, José Quintão Soares Celestino, Jumiaty Maria Freitas, Maria Solana da Conceição Soares Fernandes, Samuel da Costa Pacheco no Zulmira Auxiliadora Barros da Silva.
Enkuantu kandidatu na’in 5 ne’ebé hetan estatutu Não Apto mak Florencia Fatima Soares, José Antonio de Jesus Escurial da Silva Faria, Maria Modesta de Almeida Vieira, Nasson Maria Armindo Marques Doutel Sarmento no Sribuana da Costa.
Jurista Sérgio Dias Quintas konsidera katak, publikasaun rezultadu ne’ebé hatudu de’it estatutu Apto no Não Apto la sufisiente, tanba la inklui nota ne’ebé kandidatu ida-idak hetan.
“Lista ne’e publika de’it Apto no Não Apto, maibé la publika sira-nia nota. Ida-ne’e signifika falta justifikasaun,” Sérgio dehan ba STL iha Kaikoli, Segunda-feira (19/10/2026).
Sérgio mós hateten katak, publikasaun nota bele ajuda públiku komprende kandidatu sira-nia rezultadu no akompaña prosesu rekrutamentu ho transparénsia.
Nia subliña katak, kandidatu na’in 5 ne’ebé hetan estatutu Não Apto bele hasoru eliminasaun husi prosesu rekrutamentu, se ekipa júri rejeita sira-nia reklamasaun.
Sérgio husu atu públiku kontinua akompaña prosesu rekrutamentu ne’e, liuliu kona-ba transparénsia no publikasaun nota kandidatu sira.
Nia konsidera katak, nota importante atu ajuda públiku komprende rezultadu avaliasaun, tanba kandidatu sira ne’e konkore ba pozisaun iha instánsia judisiál aas, ne’ebé iha responsabilidade atu administra justisa iha naran povu.
Antes ne’e, Prezidente Komisaun Rekrutamentu, Avelino Coelho, hateten katak kandidatu sira ne’ebé la pasa teste iha prazu loron 15 atu submete reklamasaun.
Reklamasaun sira ne’e dirije ba ekipa júri, ne’ebé iha prazu loron 10 atu avalia reklamasaun no foti desizaun kona-ba pedidu sira ne’ebé simu.
(ter)
