DILI, STLTIMORLESTE.com – Hospital Nasional Guido Valadares (HNGV) seidauk hala’o autópsia ba sidadaun Xina, Tiago Chen, ne’ebé hetan mate iha tasi-ibun Tasi Tolu, tanba seidauk simu mandadu husi Ministériu Públiku.
Xefi Departamentu Forénsiku no Mortuáriu Hospital Nasionál Guido Valadares (HNGV), Nilton Tilman informa katak, isin-mate Tiago Chen sei hela iha mortuáriu, hein mandadu atu hala’o autópsia.
“Seidauk halo autópsia tanba hein mandadu husi Ministériu Públiku. Isin-mate sei hela iha mortuáriu to’o mandadu mai,” dehan Nilton liuhusi telefone, Segunda (19/10/2026).
Iha parte seluk, Anapaula dos Santos, feen husi matebian ne’ebé família bolu Lauchen, husu autoridade kompetente atu halo autópsia no investiga kauza loos husi nia la’en nia mate.
Nia hatete katak, isin-mate Tiago Chen hetan iha tasi-ibun Tasi Tolu, Dili, Domingu (18/10/2026). Tanba sirkunstánsia mate nian seidauk klaru, família hakarak hatene kauza loos husi insidente ne’e.
Anapaula konta katak, antes nia la’en lakon, sira han hamutuk iha uma ho sira-nia oan na’in rua. Depois, nia sai ba vizinhu, maibé bainhira fila, nia la hetan ona nia la’en iha kuartu.
“Hau fila ba uma, maibé la hetan ona nia. Nia husik hela karteira, telefone no xave motor iha kuartu laran,” Anapaula hatete.
Nia afirma katak, depois la hetan nia la’en, nia bolu sira-nia oan atu buka nia aman. Família buka iha fatin oioin, inklui área rai-hun no tasi-ibun Kakeu, maibé la konsege hetan.
Anapaula haktuir katak, iha Sábadu (17/10/2026), nia sai ba vizinhu sira iha Besi Mean atu halimar. Bainhira fila ba uma, nia la hetan nia la’en, no sira-nia oan na’in rua hela mesak.
Iha dadeer Domingu, Anapaula simu informasaun liuhusi telefone husi nia maun, polísia Inácio. Nia informa katak ema ida hetan mate iha tasi-ibun, ne’ebé depois família identifika hanesan Tiago Chen.
Anapaula afirma katak, durante sira moris hamutuk, la iha problema iha uma laran entre nia no nia la’en.
Nia mós husu atu hakoi nia la’en nia isin iha Timor-Leste, atu fasilita sira-nia oan na’in tolu bele vizita nia rate.
Tiago Chen, ne’ebé família bolu Lauchen, mak sidadaun Xina ho idade tinan 56. Nia servisu nu’udar karpinteiru no mai Timor-Leste iha tinan 2012.
Tuir informasaun família nian, Tiago kaben ho Anapaula iha tinan 2013 no hala’o kazamentu iha Igreja Katólika iha tinan 2016. Sira iha oan na’in tolu.
Anapaula dos Santos, ho idade tinan 40, mai husi Suku Dikurai, Aldeia Rotutu, Postu Administrativu Letefoho, Munisípiu Ermera.
(dom)
