DILI, STLTIMORLESTE.com — Jurista no akademiku husu atu kontinua programa julgamentu móvel iha tribunál sira, hodi aproxima justisa ba komunidade no reduz kazu pendente.
Jurista Sérgio Dias Quintas hateten katak, julgamentu móvel importante atu ajuda tribunál sira hamenus kazu pendente, liuliu kazu ne’ebé envolve komunidade dook husi tribunál.
“Julgamentu móvel importante tebes atu apoiu hamenus kazu pendente sira. Tanba ne’e, programa ne’e tenke kontinua funsiona iha tribunál sira,” dehan Sérgio Dias Quintas ba STL, iha Kaikoli, Dili, Segunda-feira (19/10).
Nia subliña katak, programa ne’e bele lori servisu justisa besik liu ba komunidade, no fasilita asesu ba sidadaun sira ne’ebé hela iha área remota.
Akademiku Universidade Nasionál Timor Lorosa’e (UNTL), Rafael De Jesus, mós defende kontinuidade programa julgamentu móvel, atu komunidade sira hetan asesu justisa ne’ebé fasil no justu.
“Julgamentu móvel hala’o iha munisípiu sira. Tanba ne’e, programa ne’e importante tebes atu kontinua,” dehan Rafael De Jesus.
Rafael esplika katak, distánsia entre komunidade no tribunál bele sai obstákulu ba parte sira atu tuir prosesu judisiál, ne’ebé dala ruma lori ba adiamentu no aumenta kazu pendente.
Tanba ne’e, nia konsidera julgamentu móvel nu’udar meiu ida atu aproxima tribunál ba komunidade, fasilita prosesu judisiál no ajuda hamenus kazu pendente iha tribunál sira.
(ter)
