PERTH, STLTIMORLESTE.com – Traballadór Timoroan balun sai husi programa traballu iha Austrália tanba insatisfasaun ho kontratu no kondisaun servisu, inklui tratamentu husi empregadór sira.
Kestaun ne’e hato’o husi Embaixadora Timor-Leste ba Austrália, Inês Maria Almeida, hato’o ba STL iha Perth, Segunda-feira (19/10/2026).
Nia esplika katak traballadór balun hasoru diferensa entre kondisaun kontratu no realidade iha fatin servisu, inklui oras servisu no gastu alojamentu ho Ida ne’e mak halai husi sistema maibe sira laos ilegal.
“Bainhira sira mai, sira asina kontratu ho oras, ezemplu semana ida sira servisu oras 38. Depois to’o kampu, realidade la hanesan,” dehan Embaixadora Almeida.
Nia hatutan katak, traballadór balun servisu loron tolu de’it iha semana, maibé nafatin hetan deskontu ba alojamentu, ne’ebé bele to’o US$ 140 ka US$ 150 kada semana.
Kondisaun ne’e, tuir Embaixadora, halo traballadór balun difisil atu rai osan no haruka osan ba família iha Timor-Leste, hanesan sira nia objetivu bainhira simu oportunidade servisu iha Austrália.
Embaixadora Almeida hatete katak traballadór balun deside sai husi programa tanba la satisfás ho kondisaun servisu ka tratamentu husi supervizór no empregadór sira.
“Supervizór empregadór sira mós ladún trata di’ak ita-nia ema sira, entaun halo sira distánsia-an husi programa,” dehan nia.
Nia esplika katak, Governu Austrália no Embaixada Timor-Leste kontinua buka dalan atu ajuda traballadór sira ne’ebé hasoru problema, inklui oportunidade atu fila fali ba programa ka muda ba empregadór seluk, tuir kondisaun no prosesu ne’ebé aplika.
Embaixadora husu traballadór sira ne’ebé hasoru problema atu kontaktu autoridade relevante, liuhusi Embaixada ka diretamente ho Governu Austrália, atu buka solusaun ba sira nia situasaun.
Nia konsidera mekanizmu ne’e hanesan dalan ida atu ajuda traballadór sira hetan oportunidade foun no evita problema kontinua.
Traballadór La’ós Ilegal
Embaixadora Almeida mós klarifika katak, traballadór ne’ebé sai husi programa la signifika automaticamente katak sira ilegal, tanba sira bele buka visa seluk tuir dalan legál ne’ebé disponivel.
Nia temi estimativa katak, traballadór Timoroan ne’ebé sai husi programa bele hamutuk ema 1.000 resin, maibé númeru ne’e bazeia ba informasaun ne’ebé traballadór sira hato’o ba nia.
Nia enfatiza katak, traballadór sira tenke buka informasaun no asisténsia husi autoridade relevante atu asegura sira nia estatutu imigrasaun no oportunidade servisu tuir lei.
Embaixadora Husu Timoroan Mantein Disiplina
Durante nia mandatu, Embaixadora Almeida hatete katak nia sente orgullu ho traballadór Timoroan sira nia disiplina, seriedade no komportamentu iha fatin servisu.
Nia dehan katak, tuir informasaun ne’ebé nia simu, empregadór sira hatudu apresiasaun ba traballadór Timoroan sira nia maneira servisu.
Embaixadora husu traballadór Timoroan sira atu kontinua mantein disiplina, serbisu ho responsabilidade no evita hahalok krime, tanba sira reprezenta Timor-Leste iha rai-li’ur.
Governu Haree Oportunidade Bolsa Estudu
Aleinde programa traballu, Embaixadora Almeida mós ko’alia kona-ba oportunidade bolsa estudu ba sidadaun Timoroan iha Austrália.
Nia hatete katak, númeru bolsa estudu ne’ebé nia hatene iha tempu ne’e besik 20, kompara ho númeru uluk ne’ebé to’o 50, no sei presiza analiza possibilidade atu aumenta oportunidade.
Maibé, nia esplika katak, kandidatu sira tenke kumpre prosesu aplikasaun, inklui kapasidade língua Inglés no rekizitu kursu ka universidade ne’ebé sira hakarak tuir.
Nia fiar katak, Timoroan barak iha kapasidade atu kontinua estudu iha nivel aas, no rezultadu edukasaun sira nian bele loke oportunidade foun ba jerasaun tuirmai.
(eme)
