PERTH, STLTIMORLESTE.com – Timor-Leste kontinua hametin parseria ho Austrália liuhusi diálogu polítiku no implementasaun Parseria Foun ba Era Foun, atu asegura benefísiu ba povu nasaun rua.
Embaixadora Timor-Leste ba Austrália, Inês Maria Almeida, hato’o deklarasaun ne’e ba STL iha Perth, Segunda-feira (19/10/2026).
Almeida enfatiza katak implementasaun parseria nian tenke lori benefísiu konkretu ba povu Timor-Leste, no governu rua presiza kontinua hametin komunikasaun no kooperasaun.
“Ita tenke haree parseria foun ba era foun. Agora nia implementasaun, maibé tenke haree nia implementasaun ida-ne’e tenke fó mós benefísiu ba ita-nia povu,” dehan Embaixadora Inês Maria Almeida.
Nia hatutan katak, enkontru entre ministru negósiu estranjeiru no funsionáriu sira ne’ebé hala’o knaar iha terrenu tenke kontinua, atu hametin parseria no rezolve problema ne’ebé bele mosu.
“Se iha problema ruma, sempre iha diálogu entre Timor-Leste ho Austrália para depois haree relasaun ne’e labele sobu,” dehan Almeida.
Nia subliña katak diálogu no kooperasaun importante tebes atu mantein relasaun bilateral ne’ebé forte no sustentável.
Parseria Foun ba Era Foun entre Timor-Leste no Austrália estabelese liuhusi deklarasaun konjunta ne’ebé Primeiru-Ministru Timor-Leste, Kay Rala Xanana Gusmão, no Primeiru-Ministru Austrália, Anthony Albanese, asina iha Díli, loron 28 Janeiru 2026.
Deklarasaun ne’e buka hametin kooperasaun bilateral iha área dame no seguransa, dezenvolvimentu ekonómiku, integrasaun rejionál, edukasaun, empregu no ligasaun entre povu nasaun rua.
Akordu ne’e mós inklui kompromisu atu kontinua kooperasaun kona-ba dezenvolvimentu Greater Sunrise, apoiu ba prioridade dezenvolvimentu Timor-Leste no kriasaun oportunidade servisu ba sidadaun Timor-Leste.
Implementasaun parseria nian sei presiza diálogu regular, konsultasaun no respeitu ba soberania nasaun rua, atu asegura katak kooperasaun ne’e responde ba interese no nesesidade povu sira.
(eme)
