DILI, STLTIMORLESTE.com – Kada sala iha ezekusaun ezame nasionál tinan 2026, estudante sira hetan akompañamentu husi profesór vizilánsia na’in rua atu kontrola prosesu ezame, no kada matéria iha durasaun oras rua.
Informasaun ne’e hato’o husi Gabinete Apoiu Tékniku (GAT), Narciso Pinto Soares Vieira da Costa, ba STL, Tersa (20/10/2026).
Narciso esplika katak, estudante sira tama ona iha sala aula tuku 7:45 dadeer atu prepara an ba ezame nasionál, ne’ebé hahú ho matéria Matemátika no Inglés.
“Ha’u hanoin katak atividade ezame nasionál hahú iha segunda-feira, ho abertura husi xefe departamentu. Estudante sira tama sala aula tuku 7:45, no kada matéria ezame nasionál iha durasaun oras rua. Estudante sira mai ho pontualidade,” nia komenta.
Nia hatutan katak, estudante sira tenke mai eskola sedu, tanba ezame nasionál la’ós hanesan loron aprendizajen normál. Tanba ne’e, estudante sira presiza prepara an no tuir oráriu ezame ne’ebé determina ona.
Enkuantu ne’e, estudante Zulmira Maia Guterres afirma katak estudante sira presiza hader sedu atu prepara an no to’o eskola tuir oras, tanba kada sala iha profesór vizilánsia na’in rua atu kontrola prosesu ezame.
“Iha sala ne’e, profesór vizilánsia na’in rua mak kontrola ezame. Tanba ezame hahú sedu, dadeer ami presiza mai eskola sedu atu labele tarde. Ida-ne’e la’ós loron aprendizajen normál, maibé loron importante ida,” nia dehan.
Estudante seluk, Feliciano de Jesus, mós afirma katak prosesu ezame nasionál lao di’ak, tanba estudante sira tama sala sedu no hein matéria ezame nian, ho profesór vizilánsia na’in rua iha sala atu kontrola sira.
“Ami iha profesór vizilánsia na’in rua iha sala, ne’ebé kontrola estudante sira. Tanba ne’e, dadeer ami tama sala atu simu matéria ezame nian husi profesór sira. Ha’u sente fasil, tanba ha’u prepara an no estuda ona antes ezame,” nia afirma.
Feliciano hatutan katak preparasaun antes ezame ajuda estudante sira atu responde pergunta sira ho di’ak. Nia mós enkoraja estudante sira atu mai eskola sedu, hein iha sala aula no tuir prosesu ezame tuir oráriu ne’ebé determina ona.
(jac)
