DILI, STLTIMORLESTE.com – Estudantes husi klase 1 to’o 8 iha eskola sira agora daudaun iha períodu feriadu, no sei hahú fila fali ba eskola iha semana daruak oin atu kontinua prosesu ensinu no aprendizajen hanesan baibain.
Gabineti Apoiu Tékniku (GAT), Narciso Pinto Soares Vieira da Costa, hato’o informasaun ne’e ba STL, Tersa-feira (20/10/2026).
Nia afirma katak, durante estudantes klase 1 to’o 8 sira iha feriadu, estudante finalista sira seluk kontinua tuir ezame nasionál.
“Ha’u hanoin katak agora daudaun estudantes husi klase 1 to’o 8 hotu iha feriadu, tanba iha semana daruak oin mak sira sei fila fali ba eskola hanesan baibain. Durante ne’e, estudantes sira seluk kontinua tuir ezame nasionál,” nia dehan.
Nia esplika katak, bainhira estudantes sira fila fali ba eskola, prosesu ensinu no aprendizajen sei kontinua hanesan baibain, enkuantu sira hein atu tuir ezame terséiru períodu.
Iha parte seluk, Eskola Sekundária Téknika Vokasionál ba Indústria no Teknolojia (ESTV-IT) 28 de Novembro, Becora, Díli, informa katak estudante na’in 79 mak tuir ezame nasionál, enkuantu estudante sira seluk sei iha períodu feriadu.
“Ami-nia estudante na’in 79 mak agora daudaun tuir ezame, no estudante sira seluk sei iha feriadu. Bainhira ezame rua ne’e remata, sira bele fila fali ba eskola atu partisipa iha prosesu ensinu no aprendizajen hanesan baibain,” nia dehan.
Entretantu, estudante Julio Moniz informa katak sira sei fila fali ba eskola iha segunda-feira, depois ezame nasionál remata iha sexta-feira.
“Ami iha feriadu hela tanba ami-nia maluk estudante sira seluk sei tuir ezame. Bainhira ezame hotu ona, segunda-feira mak ami fila fali ba eskola atu kontinua prosesu ensinu no aprendizajen hanesan baibain,” nia dehan.
(jac)
