DILI, STLTIMORLESTE.com – Servisu Edukasaun Munisipál Liquiça kontinua halo monitorizasaun ba ezekusaun ezame nasionál iha eskola sira iha munisípiu ne’e, atu asegura katak prosesu ezame ba estudante finalista sira lao ho di’ak.
Diretór Servisu Edukasaun Munisipál Liquiça, Julio da Silva, informa ba STL liuhusi telefone, tersa-feira (20/10/2026), katak prosesu ezame nasionál husi loron dahuluk to’o agora lao ho di’ak, tanba ekipa edukasaun munisipál kontinua halo monitorizasaun iha eskola sira.
“Ezame nasionál iha eskola sira iha Munisípiu Liquiça lao ho di’ak. Hahú husi loron dahuluk, ezame lao ho di’ak, tanba ami halo monitorizasaun ba eskola sira. Total estudante finalista husi nivel ensinu baziku, ensinu sekundáriu tékniku vokasionál no ensinu sekundáriu jerál hamutuk 2.931 mak partisipa iha ezame nasionál tinan ida-ne’e,” nia esplika.
Nia aumenta katak, Ministériu Edukasaun (ME), liuhusi Servisu Edukasaun Munisipál, kontinua monitoriza ezame nasionál no ezame lokál ba estudante finalista sira, atu asegura katak estudante husi eskola ida-idak bele partisipa tuir prosesu no regra ne’ebé estabelese.
“Professór vijilante sira kontinua kontrola estudante iha sala ezame ida-idak. Hafoin ezame nasionál, estudante sira sei kontinua kedas ho ezame lokál,” nia afirma.
Iha parte seluk, Diretór Servisu Edukasaun Munisipál Bobonaro, Miguel Freitas, hatete katak estudante finalista sira iha munisípiu ne’e mós tuir ezame nasionál ho di’ak, tanba eskola ida-idak halo ona preparasaun molok ezame hahú.
“Ami kontinua kontrola ezame nasionál iha eskola sira, no prosesu ezame lao ho di’ak hanesan baibain. Molok ezame, eskola ida-idak halo preparasaun no forma ekipa ne’ebé responsavel ba asuntu ezame,” nia haktuir.
Entretantu, STL tenta atu hetan konfirmasaun kona-ba prosesu ezame nasionál husi Diretór Servisu Edukasaun Munisipál Lautém, Aníbal Fernandes, maibé la konsege tanba nia okupadu ho servisu.
(jac)
