DILI, STLTIMORLESTE.com – Arlindo Dias Sanches hato’o keixa hasoru Juiz Administradór Tribunál Dili no Sekretáriu Judisiál, tanba alegasaun intervensaun iha prosesu judisiál.
Arlindo hateten ba jornalista sira iha Bairo dos Grillos, tersa (20/10/2026), katak nia aprezenta ona keixa ne’e ba instituisaun kompetente sira iha 13 outubru 2026.
Instituisaun sira ne’ebé simu keixa mak Ministériu Públiku (MP), Komisaun Anti-Korrupsaun (KAK) no Konsellu Superior Majistratura Judisiál (KSMJ).
Keixa ne’e envolve Juiz Administradór Tribunál Dili, Yudi Pamukas, no Sekretáriu Judisiál, Afonsinho Da Costa Fernandes, kona-ba alegada intervensaun iha prosesu kazu númeru 0057/2026/PGGCC.
Arlindo afirma katak, juiz administradór nia responsabilidade mak jere administrasaun tribunál, la’ós intervén iha prosesu judisiál ne’ebé juíz kompetente hala’o.
“Juiz administradór nia knaar mak jere administrasaun tribunál, la’ós intervén iha prosesu judisiál. Tanba ne’e, ami husu autoridade kompetente atu investiga,” Arlindo afirma.
Nia esplika katak, Juíza Ana Paula Fonseca hetan instrusaun atu sai husi prosesu ne’e tanba sei muda ba Oecusse, maski kazu ne’e urjente.
Tuir Arlindo, juíza ne’e mak uluk hala’o prosesu, nune’e nia konsidera katak mudansa ne’e presiza hetan klarifikasaun husi autoridade kompetente sira.
Nia husu Ministériu Públiku atu investiga alegasaun kriminál, enkuantu KSMJ bele analiza no foti desizaun administrativa tuir nia kompeténsia.
“Ami husu Ministériu Públiku atu investiga alegasaun kriminál, no KSMJ atu haree aspetu administrativu tuir kompeténsia ida-idak,” nia dehan.
Arlindo mós husu autoridade sira atu klarifika se alegada intervensaun husi juiz administradór akontese tanba inisiativa rasik ka influénsia husi hierarkia.
Nia afirma katak, investigasaun independente mak bele determina faktu sira no asegura katak prosesu judisiál la hetan interferénsia ne’ebé kontra lei.
Arlindo hateten katak, nia la haruka karta ba Prezidénsia Repúblika no Parlamentu Nasionál, tanba hakarak evita intervensaun polítika iha prosesu ne’e.
“Ami la haruka karta ba Prezidénsia Repúblika no Parlamentu Nasionál, tanba hakarak Ministériu Públiku hala’o nia knaar ho profisionalizmu,” nia afirma.
Nia aumenta katak, se Ministériu Públiku deside arquiva prosesu, nia sei simu notifikasaun no konsidera meius legál seluk tuir prosedimentu ne’ebé vigora.
Arlindo mós husu jornalista sira atu kontinua akompaña dezenvolvimentu kazu ne’e, hodi garante transparénsia no informasaun ba públiku.
To’o notísia ne’e hakerek, jornalista seidauk konsege hetan konfirmasaun diretamente husi Juiz Administradór Tribunál Dili kona-ba alegasaun ne’ebé Arlindo aprezenta.
Maibé, iha deklarasaun anterior, juiz administradór afirma katak nia responsabilidade mak administra justisa no jere tribunál tuir kompeténsia ne’ebé iha.
Dezakordu ne’e mosu iha kontestu prosesu interrogatóriu dahuluk, ne’ebé relasiona ho alegasaun krime droga hasoru sidadaun ida.
(ter)
