DILI, STLTIMORLESTE.com — Komisaun Rekrutamentu Juiz STJ no Tribunál Rekursu rejeita lista sombra ne’ebé viraliza iha Facebook, no konsidera informasaun ne’e la loos.
Prezidente Komisaun Rekrutamentu, Avelino Coelho hateten katak, prosesu konkursu seidauk to’o faze entrevista profisionál. Tanba ne’e, lista ne’ebé hale’u iha rede sosial la’ós rezultadu ofisiál husi komisaun.
“Lista ne’e nudar lista propaganda, la’ós lista ne’ebé komisaun iha,” Avelino Coelho hateten ba jornalista sira iha Supremu Tribunál Justisa, Kolmera, Sesta-feira (23/10/2026).
Nia esplika katak, konkursu ba vaga juiz STJ sei kontinua tuir etapa sira, inklui exame eskrita, no entrevista profisionál sei hala’o iha semana sira oin. Juri sei fó minutu 30 ba kandidatu ida-idak.
Avelino Coelho afirma katak, komisaun la iha kompeténsia atu nomeia juiz konselleiru ka juiz dezembargadór. Komisaun sei haruka relatóriu ba Prezidente Repúblika, Parlamentu Nasionál, Governu no Konsellu Superiór Majistratura Judisiál.
Nia enfatiza katak, nomeasaun juiz tenke tuir Konstituisaun no lei. Nia mós husu públiku atu la fiar rumór sira ne’ebé bele estraga naran ema no prejudika prosesu rekrutamentu.
Komisária Carmelita Caetano Moniz informa katak, kandidatu na’in-32 konkore ba vaga juiz STJ. Husi total ne’e, kandidatu na’in-21 hetan estatutu aptu, inklui juiz na’in-17, jurista rekoñesidu na’in-tolu no prokuradór na’in-ida.
Ba vaga juiz Tribunál Rekursu, kandidatu na’in-22 partisipa iha konkursu. Husi sira, na’in-17 hetan estatutu aptu, enkuantu na’in-lima la aptu.
Komisaun fó oportunidade loron 15 ba kandidatu sira atu hato’o reklamasaun, hahú husi loron simu notifikasaun. Lista aptu no la aptu hatudu iha Sentru Formasaun Jurídiku Judisiáriu iha loron 19 Outubru 2026.
Komisáriu José Pedro Camões hateten katak juri haruka rezultadu ba kandidatu ida-idak nia email. Kandidatu sira mós tenke hato’o reklamasaun diretamente ba juri.
Nia hatutan katak, komisaun seidauk hetan informasaun kona-ba kontéudu reklamasaun sira ka resposta ne’ebé juri fó ba kandidatu, tanba komunikasaun hala’o diretamente entre kandidatu no juri.
(ter)
