DÍLI, STLTIMORLESTE.com – Estudante na’in tolu (3) husi Eskola Sekundária Jerál (ESJ) 10 de Dezembru, Comoro, la tuir ezame nasionál tanba razaun saúde, partus no situasaun ne’ebé seidauk klaru.
Diretór ESJ 10 de Dezembru, Comoro, Manuel Verdial, hato’o informasaun ne’e ba STL, iha entrevista, Sesta-feira (23/10/2026).
“Estudante ida partus, ida moras no ida seluk to’o agora seidauk iha justifikasaun kona-ba nia auzénsia,” Manuel Verdial hatete.
Nia esplika katak, estudante ne’ebé partus nia inan-aman mai informa eskola iha loron daruak ezame nian, atu justifika nia oan nia auzénsia.
“Estudante ne’ebé partus iha direitu atu tuir fali ezame nasionál iha faze daruak, tanba nia kandidatu rejistadu,” nia esplika.
Tuir Verdial, estudante ne’ebé moras la tuir ezame hahú husi loron primeiru, no to’o agora seidauk partisipa tanba kontinua hetan tratamentu médiku.
Tanba ne’e, eskola husu estudante ne’e atu aprezenta karta ka dokumentu médiku nu’udar justifikasaun ba nia auzénsia durante períodu ezame.
Nia afirma katak, estudante na’in tolu ne’ebé la tuir ezame nasionál sei iha oportunidade atu partisipa iha xamada daruak, tuir prosedimentu ne’ebé aplika.
“Estudante hamutuk 458 partisipa iha ezame nasionál. Ohin sira kontinua tuir ezame lokál, ne’ebé sei remata iha Sábadu,” nia informa.
Manuel Verdial aumenta katak, eskola organiza estudante na’in 20 iha sala ezame ida-idak, ho profesór vizilante na’in rua atu fiskaliza prosesu ezame.
Profesór vizilante sira mai husi eskola sekundária seluk iha Díli, inklui ESJ 4 de Setembru, An-Nur, São José, Canossa, Finantil no Nobel da Paz.
(jac)
