DILI, STLTIMORLESTE.com – Aumentu númeru estudantes iha eskola sira kada tinan halo nesesáriu atu hadi’a no aumenta infraestrutura edukasaun, inklui edifísiu eskola, sala aula, meza, kadeira no livru, iha munisípiu sira.
Diretór Servisu Edukasaun Munisípiu Manatuto, Luis Antonio Soares, haktuir ba STL liuhusi telefone, Sesta (23/10/2026), katak infraestrutura eskola balun presiza hadi’a tanba númeru estudantes kontinua aumenta kada tinan.
“Infraestrutura eskola balun presiza hadi’a tanba númeru estudantes kada tinan aumenta. Iha nivel pré-eskolár, ensinu baziku no ensinu sekundáriu, hotu-hotu presiza infraestrutura, maski iha eskola sekundáriu balun ne’ebé hetan ona konstrusaun,” nia dehan.
Nia fó ezemplu katak eskola tékniku-vokasionál iha Natarbora presiza atensaun ba infraestrutura. Aleinde ne’e, presiza mós meza no kadeira ba estudantes. Enkuantu livru, tuir nia, seidauk iha problema boot, maibé presiza kontinua husu livru foun atu troka livru sira ne’ebé tuan ona.
Iha parte seluk, Diretór Servisu Edukasaun Munisípiu Bobonaro, Miguel Freitas, hatete katak munisípiu ne’e iha planu atu konstrui edifísiu pré-eskolár foun iha suku sira ne’ebé seidauk iha servisu edukasaun pré-eskolár.
(jac)
