DÍLI, STLTIMORLESTE.com — Ekipa basquetebol mane Brotherhood hetan vitória ho rezultadu 54–34 hasoru Lemocor, iha kompetisaun Liga Nasional Basquetebol Timor-Leste, domingu, 25 fulan Outubru 2026, iha Ginásio Desporto Dili.
Iha parte dahuluk, Brotherhood hahú domina jogu ho pontu 2–0, depois aumenta vantagem ba 12–4. Lemocor tenta responde, maibé Brotherhood kontinua lidera.
Iha períodu segundu, Lemocor komesa aumenta pontu no aproxima rezultadu. Lemocor konsege empate 24–24, maibé Brotherhood fila fali ba oin ho pontu 26–24 molok deskansu.
Depois deskansu, Brotherhood kontinua hatudu dominasaun iha parte daruak. Ekipa ne’e aumenta diferensa pontu, husi 28–24 to’o 45–28, iha períodu terseiru.
Iha períodu ikus, Lemocor koko hamenus diferensa, maibé Brotherhood kontinua kontrola jogu. Brotherhood aumenta pontu to’o 54, enkuantu Lemocor para iha pontu 34, no jogu remata ho rezultadu 54–34.
Durante kompetisaun, maioria jogadór Lemocor tenta halo remate husi dook atu buka pontu tolu. Maibé, tentativa sira ne’e barak mak la konsege tama ba korbasket, ne’ebé limita oportunidade atu aumenta pontu.
Iha tempu deskansu, treinadór husi ekipa rua fó instrusaun tátika no estratéjia ba sira-nia jogadór, bazeia ba observasaun durante jogu, atu hadi’a desempenhu iha períodu tuirmai.
Iha sorin seluk, apoiadór no simpatizante husi ekipa rua kontinua fó apoiu no motivasaun ba jogadór sira. Sira hakilar no haksolok bainhira ekipa ne’ebé sira apoia konsege aumenta pontu, hodi kria ambiente animadu iha Ginásio Desporto Dili.
(leo)
