BAUCAU, STLTIMORLESTE.com – Estudante na’in 12 iha Munisípiu Baucau la konsege tuir ezame nasionál tanba moras, husi númeru ne’e na’in tolu (3) rejigna an atu tuir ezame iha segundu emisaun.
Diretór Servisu Munisipál Edukasaun Baucau, Afonso dos Santos da Costa hateten katak, ezame nasionál termina ona iha semana kotuk, enkuantu ezame lokál foin termina iha Segunda-feira. Agora, servisu munisipál hein rezultadu koreksaun ba ezame lokál husi eskola sira.
Afonso esplika katak, estudante na’in 12 ne’ebé la konsege tuir ezame nasionál tanba kondisaun saúde relata ona sira-nia naran ba Ministériu Edukasaun atu prepara partisipasaun iha segundu emisaun. Maibé, estudante na’in tolu deside rejigna an atu la tuir ezame segundu emisaun.
“Estudante na’in 12 ne’e tanba moras, maibé estudante na’in tolu ne’ebé rejigna an ne’e, ha’u la hatene tanba saida,” Afonso hateten ba jornalista sira iha Vila Antiga, Baucau, Kuarta (28/10/2026).
Nia hatutan katak, estudante sira ne’ebé sei tuir ezame segundu emisaun mai husi Ensinu Sekundáriu Jerál (ESJ), Ensinu Báziku no Eskola Tékniku-Vokasionál (ETV).
Husi estudante na’in sia ne’ebé sei tuir ezame segundu emisaun, na’in-haat mak estudante ESJ, hotu-hotu feto. Ensinu Báziku iha estudante na’in-tolu, kompostu husi feto na’in-rua no mane ida. Enkuantu ETV iha estudante mane na’in-rua.
Estudante ETV na’in-rua rejista iha Eskola Tékniku-Vokasionál Katólika no Ensinu Tékniku Informatika (ETI). Estudante ESJ sira rejista iha ESJ Filial Aubaka, ESJ Filial Laga, ESJ Paraleru Laisorulai no ESJ Sakorje. Enkuantu estudante Ensinu Báziku sira mai husi Sentru Ensinu Báziku (EB) Buruma, EBF Buibau no EBF Katólika São Francisco Samalari.
“Ba ezame segundu emisaun ne’e, ita sei hein orientasaun husi nível nasionál,” Afonso informa.
Afonso konsidera katak, ezame nasionál iha Munisípiu Baucau ba períodu tinan 2026 hala’o ho susesu, tanba la akontese problema signifikativu ne’ebé bele impede prosesu ezame, inklui problema klima no seguransa. Maski nune’e, rezultadu ezame nasionál sei fó sai depois remata prosesu koreksaun.
Dadus estudante ne’ebé tuir ezame nasionál no lokál ba anu letivu 2026, Servisu Munisipál Edukasaun Baucau rejistu hamutuk 5.131 ho totál sentru ezame hamutuk 73, kompostu husi sentru Ensinu Báziku 43, Ensinu Sekundáriu Jerál 27 no Ensinu Tékniku-Vokasionál lima.
Husi totál ne’e, estudante Ensinu Báziku hamutuk 2.594, kompostu husi mane na’in-1.258 no feto na’in-1.336. Ensinu Sekundáriu Jerál iha estudante na’in-2.311, kompostu husi mane na’in-1.027 no feto na’in-1.284. Enkuantu Ensinu Tékniku-Vokasionál iha estudante na’in-226, kompostu husi mane na’in-111 no feto na’in-115.
(tom)
