DILI, STLTIMORLESTE.com – Ministru Interior (MI), Francisco da Costa Guterres seidauk simu relatóriu kona-ba rekrutamentu ajente foun Polísia Nasional Timor-Leste (PNTL) no hein dokumentu ofisiál husi Júri Rekrutamentu.
Nia dehan, katak nia seidauk bele fó komentáriu tanba relatóriu seidauk aprezenta.
“Seidauk simu, hau hein relatóriu. Sira aprezenta, ne’e di’ak, maibé hau seidauk simu, tan ne’e hau atu ko’alia saida?,”Ministru Interior Fransisco da Costa Guterres hatete ida-ne’e ba jornalista sira iha Palásiu Governu, Kuarta-feira (28/10/2026).
Nia esplika katak, Governu liuhusi Ministériu Interior entrega prosesu rekrutamentu ajente PNTL foun ba Júri Rekrutamentu atu hala’o tuir ninia kompeténsia.
Ministru dehan katak, bainhira informasaun no dokumentu ofisiál disponivel ona, bele fó informasaun ba públiku.
“Iha ona informasaun mak ita bele ko’alia. Hau seidauk hatene númeru kandidatu hira mak pasa ka la pasa. Hau hein relatóriu, depois mak ita ko’alia,” nia esplika.
Iha fatin ketak, akademiku Universidade Nasionál Timor Lorosa’e (UNTL), José Costantino Ximenes, husu ba Prezidente Júri Rekrutamentu ajente foun PNTL atu lalais aprezenta relatóriu ba Ministru Interior.
Nia konsidera katak, prosesu rekrutamentu ne’e lao di’ak, maibé husu atu asegura transparénsia no evita prátika familiarizmu.
“Rekrutamentu ne’e lao di’ak, teste sira mós lao di’ak. Ita reza atu la iha familiarizmu iha prosesu ne’e,” José Costantino afirma.
Nia mós husu ba Prezidente Júri Rekrutamentu, José Soares, ne’ebé mak Segundo Komandante-Jerál PNTL, atu aprezenta relatóriu ba Ministru Interior atu bele fó informasaun ba públiku.
Akademiku ne’e subliña katak, públiku hein ona rezultadu rekrutamentu ajente foun PNTL nian, tan ne’e importante atu fó klarifikasaun kona-ba prosesu no rezultadu.
(jen)
