DILI, STLTIMORLESTE.com —Ema idak idak nafatin konfia ba Jesus, ne’ebé hatudu Maromak nia domin liuhusi kura ema moras no bolu ema atu moris tuir Espíritu Santu.
Tuir Padre Paul Kerans, SVD, iha nia reflesaun ba Segunda-feira, 26 Outubru 2026, bazeia ba Evanjellu Lucas 13:10-17, Jesus foti inisiativa atu kura feto ida ne’ebé sofre durante tinan 18, maski feto ne’e la husu ajuda diretamente.
Padre Paul esplika katak, Jesus haree feto ne’e, bolu nia no tau liman ba nia, hodi deklara katak nia kura ona. Nu’udar resposta, feto ne’e hahi’i Maromak.
Reflesaun ne’e hatudu katak Maromak iha relasaun pesoál ho ema ida-idak, tanba Nia haree no bolu ita molok ita buka Nia. Tanba ne’e, fiéis sira presiza rekoñese Maromak nia prezensa no hatán ba Nia bolun.
“ Nia haree ita molok ita haree Nia. Nia bolu ita molok ita bolu Nia,” mak mensajen importante iha reflesaun ne’e, ne’ebé konvida fiéis sira atu loke fuan ba Maromak nia grasa.
Padre Paul mós alerta katak, dala barak, ema sai nakonu ho problema rasik to’o lakon oportunidade atu rekoñese Maromak nia prezensa. Preokupasaun no sentimentu pesoál bele impede ema atu rona no hatán ba Nia bolun.
Iha Evanjellu, ofisiál sinagoga nian foka liu ba regra kona-ba servisu iha loron Sábadu, no nia hirus bainhira Jesus kura feto ne’e. Nia reasaun impede nia atu komprende signifikadu asaun kura nian nu’udar manifestasaun domin no grasa Maromak.
Tanba ne’e, reflesaun ne’e konvida ema hotu atu la husik sentimentu no preokupasaun pesoál taka sira-nia matan ba Maromak nia obra. Fiéis sira presiza rona no hatán ba Nia bolun, no husik Espíritu Santu gia sira-nia moris, la’ós tuir de’it vontade rasik.
(eme)
