DILI, STLTIMORLESTE.com – Bee Timor-Leste, Empreza Públika (BTL-EP) rekolla reseita US$ 2,1 millaun to’o trimestre datoluk 2026, no relata katak 95% populasaun Timor-Leste asesu ona ba fonte bee.
Prezidente Konsellu Ezekutivu BTL-EP, Gustavo da Cruz hato’o informasaun ne’e ba jornalista sira iha Palásiu Prezidensiál Nicolau Lobato, Bairo Pité, Segunda-feira (26/10).
Gustavo esplika katak, reseita ne’e mai husi ligasaun foun, taxa ligasaun, pagamentu fulan-fulan hosi kliente no multa ba sira ne’ebé viola regulamentu.
Nia afirma katak, prioridade BTL-EP mak asegura asesu ba bee ho kualidade no hadi’a servisu distribuisaun ba populasaun, liuhusi investimentu Estadu.
“Estudu sira ita halo hotu ona, agora ita halo implementasaun,” dehan Gustavo da Cruz.
Nia hatete katak, relatóriu avaliasaun ne’ebé BTL-EP prepara hamutuk ho Banku Mundiál hatudu katak besik 95% populasaun Timor-Leste asesu ona ba fonte bee.
Maski nune’e, nia rekoñese katak alterasaun klimátika no fenómenu El Niño sai dezafiu ba disponibilidade bee, ne’ebé presiza planeamentu adekuadu atu prevene krize iha futuru.
BTL-EP kontinua identifika no hadi’a sistema distribuisaun bee iha komunidade, inklui instalasaun kontadór foun no atualizasaun dadus kliente.
Atualizasaun rejistu ne’e importante, liuliu ba uma-kain ne’ebé titular kontadór uluk mate ona ka muda hela-fatin, atu asegura administrasaun servisu ne’ebé di’ak.
Gustavo esplika katak, instalasaun kontadór foun kustu $55, no kliente tenke rejista ho naran ema ne’ebé hela iha uma ne’e.
Kliente sira mós presiza rezolve dívida pendente, se iha, atu regulariza ligasaun bee no asegura katak rejistu kliente tuir kondisaun atuál.
Aleinde ne’e, tékniku BTL-EP realiza verifikasaun kontadór kada fulan atu determina kuantidade bee ne’ebé kliente konsome no prepara fatura tuir konsumsi.
BTL-EP kontinua implementa programa hadi’a infraestrutura no jestaun bee, hodi asegura sustentabilidade servisu no responde ba nesesidade populasaun iha territóriu nasionál.
(eme)
