DÍLI, STLTIMORLESTE.com – Dili Institute of Technology (DIT) planeia atu simu estudante foun hamutuk 1.100 ba tinan akadémiku 2027, ne’ebé sei distribui ba departamentu 11.
Informasaun ne’e hato’o husi Pro-Reitór Akadémiku DIT, Aderita M. T. dos Santos, ba STL iha knua DIT, Tersa (27/10/2026).
Nia esplika katak, rejistrasaun ba estudante foun hahú ona iha fulan Outubru 2026 no sei remata iha finál fulan Fevereiru 2027.
DIT halo promosaun liuhusi mídia sosiál no televizaun atu informa oportunidade estudu ba estudante sira ne’ebé remata ona ensinu sekundáriu.
“Ami loke rejistrasaun hahú iha fulan Outubru 2026 no sei remata iha finál fulan Fevereiru 2027.
Ami hein katak tinan ida-ne’e kada departamentu bele simu estudante foun nain 100, tuir ami-nia kapasidade hanesan tinan kotuk,” nia dehan.
Nia kontinua katak, DIT iha departamentu 11, ne’ebé kada departamentu iha kapasidade atu simu estudante foun nain 100, ho totál estudante foun nain 1.100 ba tinan akadémiku 2027.
Relasiona ho kritériu rejistrasaun, estudante sira presiza aprezenta sertidaun batizmu, diploma, fotografia medida 3×4 tahan rua, prienxe formuláriu rejistrasaun no selu taxa rejistrasaun.
Enkuantu estudante sira ne’ebé hakarak tuir programa estudu ekstensaun iha klase lokraik, presiza aprezenta kontratu servisu atu hatudu katak sira iha atividade profisionál.
Pro-Reitór Akadémiku ne’e afirma katak, kapasidade atu simu estudante foun bazeia ba disponibilidade fasilidade no rekursu hanorin nian, inklui sala aula, laboratóriu no biblioteka.
“Tuir ami-nia kapasidade, fasilidade sala aula sufisiente, ami iha laboratóriu no biblioteka atu apoia estudante sira-nia prosesu aprendizajen,” nia afirma.
Tanba ne’e, nia enkoraja estudante sira ne’ebé remata ona ensinu sekundáriu atu kontinua sira-nia estudu superior no hili instituisaun edukasaun ne’ebé bele apoia sira-nia futuru.
Nia mós subliña katak, DIT prontu atu apoia estudante sira iha prosesu aprendizajen, hodi hametin koñesimentu no kapasidade sira-nian atu kontribui ba dezenvolvimentu nasaun.
(joa)
